СВР Штип, во координација со Одделот за криминалистичка полиција при БЈБ, поднесе кривична пријава против 74-годишниот Д.А. од Штип, осомничен за тешко убиство и противправно лишување од слобода.

Според истрагата, тој ја држел 79-годишната Б.Н. против нејзина волја во својот дом, а потоа ѝ нанел смртоносни убодни рани со остар предмет. По убиството, телото го закопал во дворот на куќата.

Случајот започнал на 24 октомври, кога нејзината сестра, 84-годишната Д.О., пријавила дека Б.Н. се оддалечила од домот.

Полицијата веднаш презела активности и по сомнеж дека жртвата е држена во домот на осомничениот, на 10 ноември со судска наредба бил извршен претрес. Во домот биле пронајдени траги од крв и повеќе предмети поврзани со кривичното дело.

По претресот, Д.А. бил уапсен и задржан 96 часа во КПУ Куманово.

По добиените вештачења и дополнително прибрани докази, осомничениот во новиот разговор со истражителите детално го опишал начинот на извршување на убиството. Телото потоа било пронајдено и по наредба на јавен обвинител испратено на обдукција.

Д.А. е изведен пред судија на претходна постапка, кој му одредил притвор од 30 дена.