Шест грофовии, куќи во боја на мед и ниту едно срушено село: регионот во кој Хари и Меган двапати барале мир

Кога Хари и Меган во 2018 сакаа мир, не отидоа во Лондон и не отидоа во Америка. Изнајмија куќа во Грејт Тју, во Котсволдс, и сериозно размислуваа да останат таму засекогаш. Сега, кога повторно се спомнува нивно враќање во Британија, истиот регион пак е на списокот. Прашањето е што има таму што го нема на другите места.

Одговорот е доста прозаичен: камен во боја на мед, ридови, и способност некој да живее целосно видливо, а сепак никој да не му доаѓа пред врата. Дејвид и Викторија Бекам имаат имот таму. Кејт Мос и Елен Деџенерес исто. Но Котсволдс не му треба ниту едно од тие презимиња за да вреди да се помине – селата стојат таму со векови пред сите нив.

Регион што се гледа само со кола

Котсволдс се протега низ грофовиите Глостершир, Оксфордшир, Ворикшир, Вилтшир, Вустершир и Сомерсет. Тоа значи дека обиколка со автомобил не е препорака, туку единствениот начин работата да има смисла. Споредните патишта се дел од искуството – тие ги врзуваат селата меѓусебно.

Бродвеј е добра појдовна точка. Главната улица е низа историски варовнички куќи, дуќани, галерии и ресторани, повеќето изградени во златната ера на трговијата со волна. Кулата Бродвеј, над градот, дава поглед врз целата околина.

Стоу-он-д-Волд и ритуалот што не се прескокнува

Неколку километри понатаму е Стоу-он-д-Волд, со огромен централен плоштад што сè уште раскажува дека тука се тргувало со волна и добиток. Тука се пие cream tea – чај со скони, џем и густа павлака. Селото ги чува и старите тесни сокаци низ кои во деновите на големите саеми поминувале стадата.

Бортон-он-д-Вотер го дели реката Виндраш, а над неа има низа мали камени мостови. Го викаат Венеција на Котсволдс, што е претерување дури и за англиски стандарди, но местото е убаво и без таа етикета. Има и макета на самото село, направена во средината на дваесеттиот век, со реплики на улиците и зградите.

Улицата што е најфотографирана во Англија

Арлингтон Роу во Бајбери е веројатно најточниот приказ на тоа што е Котсволдс: низа мали куќи во боја на мед, со коси кровови, изградени првично како живеалишта за ткајачи на волна. Денес се една од најпрепознатливите слики на Англија и се појавиле во безброј филмови.

Чипинг Камден продолжува по истата линија – главна улица со историски куќи во златен камен и дуќани, некои со стари сламени кровови. Тетбери е поранешен волнарски град, сега познат по антикварници. Во негова близина е Хајгроув, летната резиденција на кралот Чарлс III, чии градини се посетуваат на одредени датуми преку организирани тури. Кастл Ком, во Вилтшир, е толку недопрен што редовно се користи како снимателска локација за историски филмови и серии.

Патеки, палати и пабови

Најдоброто од Котсволдс не е во селата, туку меѓу нив. Регионот има густа мрежа патеки низ ливади, шуми и ридови. The Cotswold Way е главната долга патека што го пресекува регионот од север кон југ – но не мора да се изоди цела; повеќето делници се направени за прошетка од еден час и враќање во село на ручек.

Тука е и палатата Бленхајм кај Вудсток, каде е роден Винстон Черчил, и замокот Судели, поврзан со Кетрин Пар, последната сопруга на Хенри VIII. За јадење, руралните пабови се посериозна работа отколку што звучи – The Wild Rabbit во Кингам и The Kingham Plough работат со локални производители.

Маршрутата бара најмалку две ноќевања. The Porch House во Стоу-он-д-Волд и The Lygon Arms во Бродвеј се стари гостилници претворени во хотели. И тука е контрастот со она што ние го нарекуваме туристички развој: во Котсволдс, вредноста е во тоа што ништо не е срушено за да се направи нешто ново.