Инспекторите на Агенцијата за храна и ветеринарство (АХВ) спречија влез на 20.500 килограми замрзнат компир – помфрит од Холандија, откако при контролата утврдиле дека производите имаат поминат рок на употреба. Небезбедната храна беше запленета и уништена на депонијата „Дрисла“, врз основа на донесена мерка за забрана на увоз.

Според АХВ, помфритот имал рок на траење до 23 мај 2025 година, но поради неправилности и ризик по здравјето на граѓаните, комплетната пратка била нештетно уништена во присуство на инспектори.

Покрај ова, при вонреден инспекциски надзор кај оператор со храна од животинско потекло, запленети се и уништени 2.000 килограми небезбеден пилешки стек. Операторот не ги почитувал стандардите за Добра хигиенска и Добра производствена пракса, поради што му е изречена привремена забрана за работа и парична казна од 4.400 евра.

Од АХВ порачуваат дека редовните и вонредните контроли продолжуваат со цел да се спречи пласирање небезбедна храна на пазарот, да се заштитат граѓаните и да се обезбеди благосостојба на животните.