Психолог во ЈЗУ Општа болница Струга, магистер по специјална едукација и рехабилитација и психотерапевт со 14 години стручни обуки зад себе, била избркана од работа веднаш откако соопштила дека е бремена, објави СДК.мк. Наместо договорот да ѝ биде продолжен, раководството на болницата ја отстранило од работното место – период во кој, паралелно, биле вработени нови 65 лица.

Стресот што го претрпела по одлуката на менаџментот, според документите поднесени до Комисијата за спречување и заштита од дискриминација, довел до трагичен исход: жената го изгубила бебето во 27-та гестациска недела – седмиот месец од бременоста.

Комисијата утврдила директна интерсекциска дискриминација, бидејќи на нејзино место бил примена друга, помлада кандидатка, а болницата продолжила со масовни вработувања. Во пријавата, оштетената навела дека директорот ѝ рекол:
„Оди дома, сега имаш поважна работа. Бремена си.“

Во медицинската документација од Универзитетската клиника за гинекологија се наведува дека жената имала уредна и здрава бременост, без ризици.

„Тортурата врз мене го направи своето… Работев и без плата, само чекав да најдат решение“, напишала таа во претставката.

Директорот, иако не ја демантирал замената на нејзиното работно место со друг психолог, тврдел дека никогаш не ѝ кажал да си оди дома. Но, болницата не доставила доказ дека прекинувањето на договорот немало врска со бременоста.

Комисијата потсетува:
„Бремените жени уживаат посебна законска заштита, вклучително и тие ангажирани со договор на дело. Во овој случај е прекршен и Уставот, кој гарантира еднаквост.“