Полска сè уште нема изградено ниту една фабрика за ракети „Патриот“. Москва веќе ѝ испрати предупредување. Портпаролката на руското Министерство за надворешни работи, Марија Захарова, на брифинг во Москва порача дека фабриките за оружје во европските земји што произведуваат за Украина се потенцијални воени цели на Русија. Според агенциските извештаи, таа ги нарекла и „легитимни“ цели.

„Не треба да се претпоставува дека воените погони надвор од Украина што произведуваат оружје за киевскиот режим ќе бидат безбедни. Кој мисли така, се лаже“, изјави Захарова.

Поводот: една најава од Варшава

Захарова одговараше на прашање за подготвеноста на Полска да отвори производство на пресретнувачки ракети за системот „Патриот“, наменети за Украина. Според неа, отворањето фабрики и заеднички претпријатија значи дека европските држави се директно вклучени во конфликтот. Москва тврди и дека тоа само го одолговлекува неговото решавање – изјава што доаѓа во деновите кога Киев се будеше под густ смог по едни од најголемите комбинирани руски воздушни напади во последните месеци.

Варшава последниве недели повеќепати повтори дека е подготвена. Кон крајот на август заменик-министерот за одбрана Павел Залевски рекол дека Полска има капацитет и волја на своја територија да произведува ракети PAC-3, дека е отворена и за заедничко производство со Украина и дека за проектот разговара со Lockheed Martin и со американската администрација. Минатата недела заменик-министерката Магдалена Собковјак-Чарнецка додала дека фабриката би можела да никне во Полска, особено ако Украина добие американска лиценца, и тоа на побезбедна локација – најверојатно во западниот дел од земјата.

Западна Полска значи што подалеку од фронтот. Одговорот од Москва гласи: далеку не значи безбедно.

Лиценци, сервиси и бизнис

Според наводите, американскиот претседател Доналд Трамп уште на почетокот на јули, на самитот на НАТО, најавил дека Украина ќе добие лиценца за производство на „Патриот“. Зеленски за лиценците разговарал со Трамп во Њујорк. На Украина пресретнувачите ѝ требаат итно, испораките одат бавно, па до зимата ќе мора да се потпре на ракети од постојните залихи на партнерите.

Варшава, пак, не чека само на украинската лиценца. Поднела барање и за сервисен центар за „Патриот“, а на подолг рок и за сопствено производство на ракети, што не е поврзано со Украина. Преговорите со Вашингтон продолжуваат. За Полска ова е истовремено безбедност, индустрија и бизнис. За Москва – згоден повод за порака до цела Европа.

Логиката на „легитимна цел“ е опасна токму поради тоа што нема природна граница. Денес е фабрика во Полска, утре кој било погон што произведува нешто за кој било фронт. Балканот има свои фабрики за муниција и експлозиви, а уште подобро памети што значи кога големите сили одлучуваат кој е мета, а кој колатерална штета. Дали некој во регионот внимателно ги чита ваквите брифинзи?

Фабриката е сè уште на хартија, а Москва однапред ѝ ја испрати адресата.