На 1 октомври 2021 година Санкт Петербург изгледаше како да се вратил век наназад. Во величествената катедрала Свети Исак се венчаа кнезот Георгиј Романов и Ребека Бетарини – првата свадба на член на руското царско семејство во Русија по повеќе од сто години. Последниот Романов што рекол „да“ на руска земја бил кнезот Андреј Александрович, во Крим, во 1918 година – само неколку месеци пред болшевиците да ги убијат царот Николај II, царицата Александра и нивните пет деца.

Револуцијата во 1917 година стави крај на повеќе од три века владеење на Романови и ги растера преживеаните гранки низ Европа. Мајката на младоженецот, великата кнегиња Марија Владимировна, денешна глава на Руската царска куќа, црковната свадба со принцот Франц Вилхелм од Прусија ја имала во 1976 година во руската православна капела во Мадрид. Георгиј потекнува од царот Александар II преку великиот кнез Владимир Александрович, од гранката што со децении го чуваше споменот на дворот во егзил.

Невестата дојде од сосема друг свет. Италијанка, ќерка на дипломатот Роберто Бетарини, градела кариера во меѓународните односи кога го запознала Георгиј во Брисел. По неколку години врска, веридбата ја објавија во 2020. Пред црковната свадба Ребека го прифатила православието и го добила името Викторија Романовна Бетарини, иако во јавноста и понатаму е позната како Ребека.

Шлеп од шест метри и тијара во стил на кокошник

Венчаницата ја потпиша Рим Акра: класичен дизајн од италијанска свила микадо, со широка, волуминозна сукња, долги ракави и округло деколте – естетика на класичните невести од 20 век. Најспектакуларниот детал беше шлепот долг шест метри, по мерка на сцена каква што е Свети Исак. Над фустанот – наметка од руската дизајнерка Елина Самарина, извезена со традиционалниот торжокски вез со златен конец и камења, како оддавање почит на руското занаетчиство.

Круната на стајлингот беше тијарата Lacis на Chaumet: бело злато плетено како лесна мрежа и над 438 дијаманти со различни големини, инспирирана од кокошникот, традиционалната руска украса за глава. Деталот што кажува најмногу е она што Ребека не можеше да го носи: историскиот накит на Романови. Збирката на царевите денес е дел од државното наследство на Русија. Семејството смее да се венча под куполите на Санкт Петербург, но не и да ги носи сопствените семејни дијаманти. Тие ѝ припаѓаат на државата.

Гостите: од Мадрид до Балканот

Меѓу 1.500-те гости беа претставници на некогашни и сегашни европски кралски куќи. Шпанија ја претставуваше кралицата Софија, бидејќи Георгиј е кумче на неа и на кралот Хуан Карлос. Од Бугарија дојде поранешниот цар Симеон со сопругата Маргарита Гомес-Асебо, а од Албанија принцот Лека. Беше тука и египетскиот крал Фуад II. Балканот, значи, имаше свое место на прославата на руска монархија што повеќе не постои – преку наследници на престоли што исто така ги нема.

Пред катедралата се собраа љубопитни граѓани, новинари и фотографи, а младоженецот влезе придружуван од униформирана гарда. По венчавањето, младенците излегоа под свод од сабји и застанаа пред руските и странските медиуми. Еден од најсимболичните моменти дојде подоцна, кога парот ги посети гробовите на Романови во катедралата Свети Петар и Павле.

Прославата продолжи истата вечер во Рускиот етнографски музеј, со мени што ги спои потеклата на двајцата: традиционални руски јадења, италијански вина и француски шампањ. Најслаткиот момент беше тортата „Викторија Романовна“, создадена од шефот Мајкл Луис во чест на православното име на невестата, која за таа прилика облече и втор фустан. Веселбата траеше три дена и заврши со бранч во Константиновската палата, некогашен дом на една гранка на Романови, каде беа очекувани околу 700 гости, со добротворна аукција и концерт за отворањето на Руското царско музичко друштво.

Пет години подоцна, свадбата се памети по спојот на историја, мода и традиција. Но фотографиите од октомври 2021 денес се гледаат со друго око: само четири месеци подоцна, во февруари 2022, Русија ја нападна Украина. Колкумина од 1.500-те гости што тогаш се собраа во Санкт Петербург би се вратиле таму денес?