Српскиот претседател Александар Вучиќ повторно упати критики кон Хрватска, обвинувајќи го Загреб дека свесно го попречува европскиот пат на Србија. Според него, хрватските политички кругови очекувале доминација на Балканот по влезот во ЕУ и НАТО, но „Србија се издигнала како феникс“ и повторно станала значаен фактор во регионот.

„Сметаа дека со нашето слабеење ќе владеат од Триглав до Истанбул. Но Србија се издигна, буквално од пепелта“, изјави Вучиќ, додавајќи дека соседните држави наводно се здружени за да го ограничат растот на Србија.

Во контекст на европските интеграции, Вучиќ зборуваше и за можноста за отворање на Кластер 3, кој ги опфаќа медиумите, образованието, индустријата и царинската унија. Според него, Белград ги исполнува сите обврски, но „не е голем оптимист“ дека ќе се постигне напредок.

Изјавата доаѓа во период на засилени тензии меѓу Белград и Загреб, во момент кога ЕУ инсистира Србија да ја усогласи својата надворешна политика со европските позиции, особено во однос на Русија.