Македонија влезе во формални преговори со Обединетото Кралство за можноста да прифаќа мигранти чии барања за азил биле одбиени во Британија, објави британскиот „Тајмс“, повикувајќи се на владини извори. Веста ја пренесоа и други британски медиуми, со дополнителни детали и контекст.

Според нивните информации, станува збор за нов модел на соработка со кој Лондон би ги пренасочувал одредени категории мигранти кон партнерски земји. Предлог-планот предвидува финансиска поддршка за Македонија за секој лице што би го прифатила, како и дополнителни инвестиции во безбедносниот сектор, во светло на зголеменото руско влијание на Западен Балкан.

Разговорите започнале оваа есен, со што Македонија се приклучила на група држави кои преговараат за слични аранжмани. Британскиот премиер Кир Стармер ја гледа оваа шема како потенцијално средство за одвраќање на мигрантите што се обидуваат да го преминат Ла Манш со мали чамци.

Според информациите, мигрантите би можеле да поднесат барање за азил во Македонија или да аплицираат за работни визи во сектори со недостиг на работна сила. За разлика од моделот „Руанда“ на претходната британска влада, мигрантите нема да бидат сместени во затворен тип центри и би можеле слободно да ја напуштат земјата.

Истовремено, косовските власти наводно веќе воделе слични разговори, додека Албанија и Босна и Херцеговина одбиле ваков аранжман.

Од канцеларијата на британскиот премиер одговориле дека не коментираат тековни иницијативи, но нагласиле дека Лондон работи на сериозни мерки за справување со миграцијата.

Сепак, ваквите тврдења веќе еднаш беа демантирани. На 17 мај 2025 година, британскиот амбасадор Метју Лосон изјави дека договорите меѓу Македонија и Обединетото Кралство се однесуваат на полициска соработка, разузнавање и борба против криминални групи, а не на прифаќање мигранти.

Развојот на овие разговори доаѓа во период кога бројот на мигранти што пристигнуваат во Британија преку Ла Манш достигна над 39.000 оваа година – 17% повеќе од истиот период лани.

Северна Македонија и Обединетото Кралство неодамна склучија и стратешки договор што предвидува британска помош за изградба на брза железница на Коридорот 10, за која Скопје треба да повлече кредитна линија од околу шест милијарди евра.