Пазарот за украдени лозинки OLVX водел до Голема Речица: МВР ја слави акцијата, а молчи дали има македонски жртви

Македонската полиција и американското Федерално истражно биро (ФБИ) ја затворија платформата OLVX – нелегален онлајн пазар на кој се продавале украдени лозинки, пристапи до кориснички сметки и алатки за компјутерски измами. Трагата завршила во Голема Речица, тетовско. Кривична пријава до Основното јавно обвинителство Тетово е поднесена против 20-годишниот Е.А., кој според МВР бил администратор на домените и веб-страниците на пазарот од 2023 до 2025 година.

Пријавата ги наведува „компјутерска измама“, „злоупотреба на лични податоци“ и „производство и дистрибуција на детска порнографија“. Истрагата, според МВР, покажала и дека во 2025 и 2026 година осомничениот ја водел групата „ONEMILI“ на Телеграм, каде се нуделе алатки за измами со незаконско враќање пари, и дека преку Телеграм набавувал материјали со сексуална злоупотреба на деца. Тоа последното не е сајбер-ситница – тоа е најтешкиот дел од пријавата.

Бројката 1.500 значи две различни работи

Тука почнува делот што соопштенијата не го објаснуваат. МВР вели дека на пазарот биле понудени „над 1.500 украдени пристапни акредитиви“. ФБИ ја кажува бројката 1.500, но за нешто сосема друго – над 1.500 сметки преку кои се продавале податоците на жртвите. Според достапните информации, запленетата инфраструктура содржела податоци за повеќе од 2.600 кориснички сметки и над 1.500 профили на продавачи, а прометот на платформата надминал половина милион американски долари. Ако 1.500 се продавачите, а не украдените лозинки, тогаш вистинскиот број жртви никој јавно не го изговорил.

ФБИ барем кажа кого штити: платформата, според нив, „директно ја загрозуваше дигиталната безбедност на илјадници американски граѓани“. МВР не соопшти дали меѓу украдените сметки има и македонски корисници, македонски фирми или, не дај Боже, државни институции. Дали никој не прашал – или некој прашал, па не добил одговор?

Прва заедничка акција – и тоа е вест само по себе

Двете служби ја претставија операцијата како прва заедничка координирана сајбер-акција меѓу МВР и ФБИ. Акцијата, според МВР, тргнала од информации што ги доставило ФБИ. Значи, пазарот што бил отворен на обични веб-домени, не на некој скриен „темен интернет“, со години работел додека некој од другата страна на Атлантикот не ја кренал слушалката.

Пофалбите си ги разменија, честитките стигнаа. Но лозинките што поминале низ OLVX не исчезнуваат со гаснењето на страницата – тие остануваат во базите на сајбер-криминалците. Најмалку што граѓаните заслужуваат е да знаат дали и нивната е меѓу нив.