Кичево: ученичкиот превоз чинел 42 милиони денари во 2024, а 21 милион во 2025 – кој плаќал двојно?

Градоначалникот на Кичево, Александар Јовановски, излезе со отчет за првите десетина месеци на функцијата, која ја презеде во ноември 2025 година. Отчетот е долг, но во него има една бројка што вреди повеќе од целата прес-конференција.

Ученичкиот превоз: од 42 милиони денари во 2024 на 21 милион во 2025

Според Јовановски, за ученички превоз Општината во 2024 година исплатила 42 милиони денари, во 2025 година 21 милион, а во 2026 година, до периодот опфатен со отчетот, 7.120.000 денари. Ако децата и понатаму се возат до училиште, а трошокот се преполовил за една година, тогаш прашањето не е колку заштедил новиот градоначалник. Прашањето е кој и зошто плаќал двојно претходно – и дали некој некогаш ќе ги провери тие договори.

Слична е сликата со присилната наплата и извршните налози: 18,5 милиони денари во 2024 година, 17,7 милиони во 2025, а во 2026 досега 5 милиони. Општината годинава нема ни надворешен адвокат, со што, вели градоначалникот, се избегнува трошок од околу 650.000 денари годишно. Тоа се пари што секоја година излегувале од општинската каса за долгови и судски постапки. Зошто толку – отчетот не објаснува.

Списокот на проекти и она што допрва треба да се види

Останатиот дел е класичен отчет: над 2.170 активности и повеќе од 1.500 управни акти во урбанизмот од март до август, измени на ДУП-ови на околу 20 хектари, подготовка за продажба на околу 40 градежни парцели, реконструирани патишта кон манастирот „Св. Богородица Пречиста“ и во селата Србица, Вранештица, Грешница, Колибари и Црвивци, нови паркинзи и детски паркови, енергетска ефикасност во училиштата и 4Д ехо апарат за Општата болница.

Најавен е и нов пакет капитални инвестиции вреден над 470 милиони денари, односно повеќе од 7,5 милиони евра – спортски терени во „Горица“, резервоарот „Осој“, паметни водомери и реконструкција на градскиот плоштад од околу 2,5 милиони евра. Најавите се лесни, тие стојат на хартија. Бројката за ученичкиот превоз е друга работа: таа или кажува дека претходно се плаќало многу повеќе отколку што требало, или дека нешто во бројките не е кажано до крај. Во двата случаи, Кичевчани имаат право да знаат кое од двете е.