Скопје повторно без приватни автобуси: 40 минути чекање во Волково, линијата 23 ја немало ни по еден час

Вторник наутро, 6:15 часот, Волково. Луѓето чекаат автобус. Во 6:47 конечно заминува еден на ЈСП, од Средсело кон Лепенец. Повеќе од 40 минути – ништо. „Приватните превозници изгледа не возат денес“, напишал еден жител во локалната група на социјалните мрежи, со совет за соседите: „Излезете порано ако сакате да не доцните.“

Волково не беше исклучок. Во Ченто луѓето залудно ги чекале линиите 45 и 23, кои ги возат приватни превозници, па пешачеле до други постојки и доцнеле на работа. Патниците на линијата 23 тврдат дека чекале и повеќе од еден час. Кај Железничката станица линиите 5, 15а и 27 минувале толку преполни што луѓето физички не можеле да се качат. Од Топанско Поле, пак, жителите се жалат дека приватната деветка не вози по утврдената траса и не застанува на сите постојки.

Сценариото е старо

Официјално објаснување за вторничкиот хаос засега нема. Но патниците веќе го знаат сценариото. Во јуни 2025 година приватните превозници два дена не возеа, тврдејќи дека ЈСП им должи над 150 милиони денари, и се вратија откако им беше исплатен дел од долгот. Во октомври истата година го скратија работното време на 5 до 10 часот наутро, повторно поради неплатени обврски, тогаш од 90 милиони денари. Во февруари годинава дел од приватните автобуси не можеле да тргнат поради дефект на ГПС-валидаторите.

Град Скопје не одговара на прашањата дали некој воопшто ја контролира работата на приватниците, кои со договор се дел од јавниот превоз и мораат да го почитуваат возниот ред, ниту дали и колку месеци им се должи. Двете прашања се поврзани. Ако превозникот не е платен, тој застанува. Ако е платен, а сепак не вози, тогаш договорот не вреди ни колку хартијата на која е напишан. Патникот не е страна во тој спор, но токму тој стои на постојката.

Опозициската СДСМ ја искористи ситуацијата за остра изјава против градоначалникот Орце Ѓорѓиевски, тврдејќи дека „граѓаните чекаат по 40 минути на постојка“ и дека најавите за дополнителни автобуси од минатата година „останаа најави“. Политичката размена ќе продолжи. Зимата, пак, ќе дојде без разлика кој е во право, а со неа и снегот на постојките. Дали до тогаш некој ќе каже јавно колку му должи ЈСП на кого, и кој ги казнува оние што не возат по договор?