Airbnb им забранува на домаќините да бараат од гостите да ги мијат садовите и да го изнесуваат ѓубрето: гостите веќе плаќаат за чистење, а дел од домаќините се бунат

Платиш такса за чистење, а на заминување те пречека список: симни ги постелнините, измиј ги садовите, пушти ја машината за перење, изнеси го ѓубрето. За ѓубрето што останало во станот понекогаш следуваше и солидна казна. Тоа е поплаката што гостите на Airbnb со години ја повторуваат на социјалните мрежи, и платформата конечно реагира.

Според новите правила, домаќините повеќе нема да смеат да бараат од гостите да ги симнуваат постелнините, да ги мијат и редат садовите, да пуштаат перење или да го изнесуваат ѓубрето од објектот. Правилото важи за резервациите направени на 20 ноември или подоцна. Исклучоците се ретки и практични: во време на суша домаќинот сè уште може да побара штедење вода, а во краевите каде мечките се ризик – ѓубрето да се фрла во канти заштитени од нив.

Дел од домаќините не се воодушевени. На форумите на платформата објаснуваат дека основното чистење е прашање на хигиена и заштита на имотот, и дека трошокот за подготовка на станот за следниот гостин паѓа на нив. Еден домаќин напишал дека на гостите им се дава „целосна слобода да бидат мрзливи, додека домаќините го носат ризикот“. „Големата разлика меѓу хотелите и мојот приватен дом е личниот допир“, додал тој, и се заканил дека по дванаесет години ќе го повлече огласот и ќе се откаже од Airbnb.

Аргументот звучи разумно сè додека не се погледне што гостинот веќе платил. Тој плаќа посебна такса за чистење, а потоа чисти сам – еднаш со пари, втор пат со сопствен труд. Airbnb тоа добро го знае: во 2024 година платформата беше под лупа затоа што домаќините додаваа такси за чистење откако гостинот веќе резервирал, а уште во 2023 компанијата се фалеше дека повеќе од 260.000 домаќини ги намалиле или укинале тие такси. Од мај 2025 цените во пребарувањето насекаде во светот стандардно се прикажуваат вкупно, со таксите, но без даноците.

Платформата чекор по чекор се приближува до хотел, а домаќините бранат нешто што велат дека хотелот не може да го понуди. Колку од нив навистина ќе заминат, ќе се види. Гостите, од кој било крај да доаѓаат, тешко дека ќе жалат за списокот задачи залепен на фрижидерот.