Патот за Теферич пропадна шест месеци по новиот асфалт: Осум месеци подоцна стигнаа камионите, а рокот е цела година

Осум месеци по првото оштетување, на патот за Теферич конечно работат камиони и механизација. За тоа не дозна јавноста од институцијата, туку од жител што објави видео на социјалните мрежи.

Од Министерството за транспорт потврдија дека работите ги изведува фирмата „Цеацон“, избрана на тендер распишан во јули и воведена во работа на 29 септември. Договорот е 48,8 милиони денари за изведба и 317.000 денари за надзор. Рокот за завршување е една година. Значи патот, затворен од февруари, може да чека до есента 2027 година. Кој сега ќе им објасни на жителите дека ова е брза интервенција?

Да се потсетиме како се стигна тука. Патот се оштети во февруари, само шест месеци откако беше асфалтиран и обновен. Во март имаше ново, посериозно пропаѓање и одвојување на земјиштето. Вицепремиерот и министер Александар Николоски рече дека станува збор за сериозно свлечиште и дека Општина Кисела Вода и Град Скопје немаат ниту можност ниту капацитет да се справат, па проектот го презеде Министерството.

Свлечиштето е природа, но новиот асфалт е нечија одлука. Општина Кисела Вода досега ги нема објавено деталите од последната санација во 2025 година и не одговори на новинарски прашања која фирма ја извршила санацијата, кога бил објавен тендерот и кој бил надзор. Даночните обврзници сега ќе платат речиси 49 милиони денари за поправка на нешто што веќе еднаш го платиле. Пред да се истури новиот слој, не би било лошо да се знае кој го потпиша стариот.