Авионот во кој се наоѓаше началникот на Генералштабот на либиската армија исчезна од радарот над Анкара по барање за итно слетување. Потрагата по авионот и неговите патници е во тек.

Авионот во кој се наоѓал висок воен функционер на Либија исчезнал од радарот над Анкара, а во тек е интензивна потрага по авионот и евентуалните преживеани, потврдија турските власти.

Според изјавата на турскиот министер за внатрешни работи, началникот на Генералштабот на либиската армија, Мухамед Али ал-Хадад, бил во приватниот авион „Фалкон 50“. Авионот полетал од аеродромот во Анкара и бил на пат кон Триполи, но комуникацијата со контролата на летање била изгубена кратко по полетувањето.

Како што е наведено, врската со авионот била прекината во 20:52 часот, а кратко пред тоа, пилотот побарал дозвола за итно слетување. Во авионот имало вкупно пет лица.

Турските медиуми претходно објавија дека воздушниот простор над турската престолнина е привремено затворен за цивилен сообраќај, што дополнително ги поттикна сомнежите дека станува збор за сериозен инцидент.

Телевизијата НТВ објави дека е изгубен контакт со приватен авион што полетал од Анкара и дека меѓу патниците бил началникот на Генералштабот на либиската армија. Во меѓувреме, либиската телевизија „Либија ал-Ахрар“ ја пренесе изјавата на министерот за односи и политички работи на Либија, Валид ал-Лафи, кој изјави дека либиските власти веднаш биле информирани од Турција за исчезнувањето на авионот.

Според него, прелиминарните информации укажуваат на технички проблеми како можна причина за инцидентот, но сè уште се чека официјална потврда и дополнителни детали од турските власти.

„Очекуваме нови информации од турска страна. Постои претпоставка дека авионот се урнал“, соопшти либиската телевизија.

Покрај Мухамед Али ал-Хадад, во авионот биле и неговиот советник, двајца генерали и членови на придружбата.