Црна Гора се соочува со сериозен ризик од недостиг на гориво поради регионалните протести и блокадата на јадранското пристаниште Бар, кое е клучна точка за увоз и складирање на нафта и нафтени деривати. Возачите на камиони го блокираа пристаништето во знак на протест против рестриктивните правила за престој во Шенген-зоната, поради кои им се заканува депортација доколку го надминат дозволениот рок.

Пристаништето Бар е единствената голема влезна точка за странски горива во Црна Гора, земја која нема сопствена рафинерија. Истовремено, блокадите на граничните премини во Србија, Босна и Херцеговина, Северна Македонија и Црна Гора го парализираа транспортот по клучниот коридор што ја поврзува Европската Унија со Турција и Блискиот Исток.

Министерството за енергетика на Црна Гора побара итни информации од нафтените компании за состојбата со резервите и предупреди дека, според првичните проценки, пазарот би можел да функционира само уште неколку дена доколку блокадите продолжат. Надлежните апелираат граѓаните да не создаваат паника и да избегнуваат купување прекумерни количини гориво.

Возачите, пак, бараат продолжување на дозволениот престој во Шенген-зоната, истакнувајќи дека сегашните правила не ја земаат предвид реалноста на транспортниот сектор и големиот обем на стока што секојдневно се пренесува низ Европа.