Српскиот претседател Александар Вучиќ потврди дека Србија купила хиперсонични балистички ракети воздух-земја од Кина (систем CM-400), способни да погодуваат цели на растојанија до 400 километри. Фотографии на МиГ-29 авиони со новите ракети се појавија на 9 март.

“Имаме значителен број од овие ракети и ќе имаме уште повеќе” – изјави Вучиќ, нагласувајќи дека Србија е трета земја во светот и прва во Европа која поседува хиперсонични балистички ракети. Тој тврди дека земјата има доволен капацитет за одвраќање од Хрватска, Албанија и Косово заедно.

Хрватскиот премиер Андреј Пленковиќ соопшти дека Загреб ќе ги предупреди партнерите во НАТО за новото оружје во арсеналот на српските воени сили, нагласувајќи дека не очекува Србија да ги употреби ракетите против соседни земји. Пленковиќ го окарактеризира оружјето како “сериозно”.

Вучиќ истовремено изјави дека Србија ќе ја зачува неутралноста и нема да се приклучи на НАТО, нагласувајќи дека не намерава да напаѓа никого, туку само да се брани.