Чувствителни здравствени податоци на приближно 6.500 пациенти од Србија се појавија на „Темната мрежа” по хакерски напад. Поголемиот дел од податоците се однесуваат на гинеколошки пациентки и вклучуваат имиња, адреси, телефонски броеви, дијагнози и терапии.

Според достапните информации, најновите извлечени записи датираат од декември 2025, додека дел од податоците се стари неколку години. Базата вклучува имиња на лекари од повеќе здравствени установи.

Хакерите тврделе дека приватна гинеколошка клиника одбила да плати откуп, по што базата на податоци била објавена. Овој инцидент се случува кратко по друг голем пробив во март, кога податоците на 338.934 корисници на Телеком Србија беа компромитирани.

Здравствените информации спаѓаат меѓу најзаштитените категории на лични податоци. Организацијата Share Foundation предупреди дека засегнатите лица треба да внимаваат на потенцијални фишинг пораки и да го пријават случајот до Повереникот за заштита на податоци.