Портпаролот на ВМРО-ДПМНЕ Бране Петрушевски обвини дека претходната власт предводена од СДСМ и ДУИ донела измени во деталниот урбанистички план во Тетово, со кои директно му овозможила бизнис вреден 200 милиони евра на прорускиот бизнисмен Миодраг Давидовиќ – Дака.

Според Петрушевски, промените во ДУП-от биле донесени само еден ден по формирањето на новата влада во 2020 година. Измените се однесуваат на локацијата на поранешниот индустриски комплекс СИК Јелак, купен преку компанијата „Јелак Градба”.

Новиот урбанистички план овозможувал изградба на над 2.000 станбени единици, значителен деловен простор и повеќе трговски центри.

„Тие го претворија Тетово во бетонска џунгла заради бизнис интересите”, изјави Петрушевски на прес-конференцијата, претставувајќи ги овие тврдења како доказ за злоупотреба на власта за приватна економска корист.