СДСМ го обвини премиерот Христијан Мицкоски дека ангажирал странска приватна разузнавачка компанија за следење на опозицијата, конкретно на лидерот Венко Филипче. Компанијата за која станува збор е „Black Cube” – израелска фирма позната како „приватен Мосад”, истата која беше поврзувана со политички операции во Унгарија и Словенија.

Опозицијата не застана само на обвинувањата. СДСМ поднесе кривична пријава до Основното јавно обвинителство против Мицкоски за злоупотреба на службена положба, а испрати и писма до институциите на Европската Унија и до амбасадорите, предупредувајќи за она што го нарекуваат политички прогон.

Black Cube – компанијата која ги тресе демократиите

Black Cube не е непозната фирма. Во минатото била поврзувана со активности во повеќе земји, вклучувајќи шпионирање на политички противници и фабрикување скандали за политички цели. Аферата со Black Cube во Словенија – каде беше поврзана со обид за влијание на изборите – е свежа тема, особено сега кога Јанша се враќа на власт делумно токму заради таа афера.

Дали истата компанија навистина работи и во Македонија? СДСМ тврди дека да, а Мицкоски за сега не го демантира директно. Неговиот одговор: „Секој има право да пишува, но моите чувства стануваат сè посилни” – загатнувајќи заострување на правните дејства против поранешни функционери.

Што е всушност во игра?

Доколку обвинувањата се вистинити, станува збор за премиер кој користи странска разузнавачка фирма за следење на домашната опозиција – нешто што е директно кршење на уставните права и демократските принципи. Доколку се невистинити, СДСМ игра опасна игра со конструкции на меѓународно ниво.

Но едно е сигурно: кога името „Black Cube” ќе се спомне во една земја, тоа никогаш не е добар знак. Компанија специјализирана за тајни операции и политички манипулации – и премиер кој наместо да демантира, зборува за „чувства”. Македонските граѓани заслужуваат јасен одговор, не криптични пораки.