Двајца бизнисмени поврзани со поранешното раководство на ДУИ го презеле сопствеништвото на компанијата „Интернатионал Фреш Фоод“, фирма која во своите почетоци добивала државна финансиска поддршка и беше претставена како голема инвестиција за снабдување на брендот KFC со пилешко месо во регионот.

Компанијата е регистрирана во 2018 година и беше најавувана како најголем проект во живинарската индустрија во Македонија. Во 2020 и 2021 година, Владата ѝ доделила вкупно над половина милион евра државна помош за инвестирање.

Меѓу новите сопственици се појавува Ељмедин Адеми, сопственик на градежната компанија „Еуровиа“ од Желино – фирма која беше предмет на ревизија поради повеќе тендери, меѓу кои и оној за адаптација на спортскиот центар „Борис Трајковски“ за конференцијата на ОБСЕ.
Адеми е внук на поранешниот министер од ДУИ Абдулаќим Адеми, а „Еуровиа“ беше еден од најголемите донатори на партијата.

Од сопственичката структура во меѓувреме излегол Аљибер Ибраими од Тетово – лице поврзано со компании кои во време на енергетската криза набавуваа јаглен за РЕК Битола во вредност од десетици милиони евра.

Базата на „Интернатионал Фреш Фоод“ се наоѓа во Врапчиште, со подружници во Скопје, Требош и Крива Паланка. Проектот првично беше промовиран како инвестиција со европски стандарди, која ќе создаде 3.000 нови работни места и ќе развие модерно производство на свежо пилешко месо за домашниот и регионалниот пазар.

Во минатото, фабричките капацитети беа посетувани и промовирани од политичари, а проектот се претставуваше како пример за успешна странска и домашна соработка во агросекторот.