Премиерот Христијан Мицкоски го пречека Метју Витакер, постојаниот претставник на САД во НАТО, за разговори за безбедносна соработка. Посетата вклучуваше обиколка на касарната „Илинден” во Скопје, каде учествуваа и министерот за одбрана Владо Мисајловски и началникот на генералштабот.

Мицкоски најави „нов импулс во односите со САД, со безбедноста како прв приоритет”. Македонија го зголемува одбранбениот буџет и ја модернизира армијата за да ги исполни НАТО стандардите. Официјалната порака: кредибилен сојузник со значителни инвестиции во модернизација.

Посетата доаѓа во момент кога европската безбедносна архитектура се менува – Германија произведува оружје наместо автомобили, американските гаранции се помалку сигурни, а НАТО ги преиспитува приоритетите. Во тој контекст, Македонија како мала земја мора да покаже дека придонесува, а не само дека членува.

Дали зголемениот одбранбен буџет е инвестиција во безбедност или цена за останување релевантен? Во НАТО, како и секаде, важи правилото: кој плаќа, тој има глас. Македонија засега ги плаќа сметките – прашање е дали гласот ќе се слушне.