Албанскиот премиер Еди Рама отворено ја критикува Европската Унија: „Европа направи голема стратешка грешка што ги пресече сите канали со Русија. Европа мора секогаш, секогаш, секогаш да разговара со сите.”

Неговите зборови директно се спротивставуваат на пристапот на Урсула фон дер Лајен и шефицата за дипломатија Каја Калас, кои избегнуваат контакт со Путин, аргументирајќи дека дијалогот е бесмислен додека Москва е посветена на продолжување на конфликтот.

Рама, чија земја се стреми кон членство во ЕУ, тврди дека Европа „себеси се казнува на периферијата на секој иден мировен договор” избегнувајќи директен ангажман со Москва. „Колку подолго го одложуваме овој дијалог, толку помалку глас ќе имаме на крајот, бидејќи без разлика како завршува оваа војна, Русија нема да замине никаде”, порачува Рама.

Интересно: земја без руски гас, без руски инвестиции, без никакви зависности од Москва – дава совет на оние кои се длабоко зависни. Рама може слободно да зборува токму затоа што нема што да изгуби. Прашањето е дали е во право.