Drejtorët e CIA-s nuk fluturojnë në Moskë për një takim protokollar me kafe. Kur kjo ndodh, zakonisht do të thotë se diçka tjetër tashmë nuk funksionon.

Xhon Retklif, drejtori i Agjencisë Qendrore Amerikane të Inteligjencës, të martën ishte në Moskë. Vizita nuk ishte paralajmëruar. Sipas shkrimeve të mediave amerikane që thirren në burime të paemërtuara, ai e paralajmëroi Rusinë të mos sulmojë aleatë të NATO-s dhe kërkoi nga Kremlini ta zvogëlojë kontributin ushtarak dhe financiar ndaj Iranit.

Fshehtësia që në vetvete është mesazh

Mënyra si u organizua vizita thotë po aq sa përmbajtja. Mediat perëndimore publikuan se një avion ushtarak u ngrit nga Riga. Kievi, gjoja, u lut të ndalte përkohësisht sulmet me dronë mbi Moskën dhe rajone të tjera ruse - që delegacioni amerikan të kalonte i sigurt.

Ndaluni te ajo fjali. Ukraina, në mes të luftës, merr kërkesë të mos godasë për disa orë që shefi i CIA-s të mund të ulet në kryeqytetin e armikut. Ky nuk është detaj diplomatik, kjo është pamje e asaj se kush kujt dhe sa i drejtohet në këtë luftë.

Zëdhënësi i Kremlinit, Dmitrij Peskov, konfirmoi se Retklifi kishte ardhur për bisedime „mes shërbimeve të sigurisë“ dhe theksoi se Vlladimir Putin nuk u takua me zyrtarin amerikan. Ai „nuk u takua“ është vendosur me kujdes - Moska do të tregojë se nuk ishte ajo që kërkonte.

Herën e fundit kur ndodhi kjo, pasoi lufta

Kjo është pothuajse me siguri udhëtimi i parë i Retklifit në Moskë në këtë funksion. Herën e mëparshme kur një drejtor i CIA-s shkoi atje ishte viti 2021, kur Uilliam Bërns u takua me Putinin. Presidenti i atëhershëm amerikan, Xho Bajden, e dërgoi me detyrën të parandalonte përshkallëzimin rreth Ukrainës. E dimë si përfundoi.

Kjo nuk do të thotë se historia përsëritet automatikisht. Do të thotë se konteksti në të cilin dërgohet një njeri i tillë është i njohshëm: kur kanalet e rregullta diplomatike janë të bllokuara, dërgohet zbuluesi - sepse ai mund të thotë gjëra që ambasadori nuk guxon dhe të dëgjojë gjëra që ministri nuk do t'i pranojë.

Balltiku, Irani dhe fronti hibrid

Sipas „Politikos“, paralajmërimi kishte të bënte me përshkallëzim të mundshëm që përfshin anëtaret baltike të NATO-s. „Uoll Strit Xhornal“, nga ana tjetër, publikoi vlerësime inteligjence se Rusia po përgatit valë të reja mobilizimi dhe testim të kufijve të NATO-s përmes operacioneve hibride nëpër Evropë.

Të njëjtën ditë në Moskë mbërriti edhe Poll Riçard Gallager, sekretari i Vatikanit për marrëdhëniet me shtetet, për bisedime me ministrin rus të punëve të jashtme Sergej Llavrov. Vatikani ofroi gatishmërinë e Selisë së Shenjtë për ndërmjetësim për paqe në Ukrainë. Kur Uashingtoni dërgon një zbulues, ndërsa Vatikani dërgon një diplomat, në të njëjtën javë, në të njëjtin qytet - kjo nuk është rastësi në orar.

Maqedonia është anëtare e NATO-s. Testimi i kufijve të Aleancës përmes operacioneve hibride nuk është abstraksion nga një raport, është kategori në të cilën hyjnë sulmet kibernetike, dezinformatat dhe presioni mbi infrastrukturën energjetike. A i ndjekin institucionet tona këto vlerësime me të njëjtën seriozitet me të cilin i ndjekin aleatët që i prodhojnë - apo presim që dikush të na i përkthejë kur tashmë të jetë vonë?