Në orën dy pas mesnate, kur lagjja fle, dy persona vijnë me trotinetë elektrikë para kompleksit tregtar në Shuto Orizare. Nuk nxitojnë. Derdhin lëng të ndezshëm mbi vitrinat, i ndezin dhe largohen nga e njëjta rrugë nga erdhën. I gjithë veprimi zgjat më pak se një minutë. Rezultati: mbi 20 dyqane të djegura.

Pamjet, të publikuara në rrjetet sociale, e ndryshojnë tërë çështjen. Ajo që dje ishte „zjarr në një qendër tregtare“ - një formulim që i lejon secilit të mendojë për rrymën, për një cigare, për një aksident - sot është diçka krejt tjetër. Dikush erdhi, dikush ndezi, dikush iku. Kjo nuk është fatkeqësi, kjo është vepër.

Sipas të dhënave të Qendrës për Menaxhim me Kriza, zjarrin e shuan 15 zjarrfikës me gjashtë automjete, nga ora 3:31 deri në 6:45. Tre orë e katërmbëdhjetë minuta për të shuar atë që u vu për pesëdhjetë sekonda. Të gjitha dyqanet e djegura ishin pronë e një personi dhe ishin dhënë me qira - pra u dogj puna e tjetrit, malli i tjetrit, paratë e qirasë që tashmë ishin paguar.

Kush paguan, e kush përgjigjet

Nga Ministria e Punëve të Brendshme deri tani nuk ka përgjigje zyrtare për shkakun. Ka këqyrje, ka „masa të ndërmarra për zbardhjen e rastit“ - formulim që secili në këtë vend e di përmendsh. Pyetja që mbetet është më konkrete: ekziston pamja e kamerës, ekziston ora, ekziston data, ekzistojnë dy persona me trotinetë. Sa kohë duhet për ta mbyllur një rreth të tillë?

Sepse çështja nuk është abstrakte. Në ato dyqane kishte mall tekstili dhe mallra të tjera. Pas secilit prej tyre qëndron një njeri që e hapi në mëngjes, e rreshtoi mallin dhe llogariti se do të ishte aty edhe të nesërmen. Rreth njëzet familje mbetën pa burim të ardhurash në një natë - dhe askush ende nuk e ka thënë me zë fjalën „motiv“.

Pamjet i publikoi një medium lokal në rrjetet sociale, jo një institucion. Dhe pikërisht aty qëndron poenta e vetë historisë: prova që ndryshoi kuptimin e rastit erdhi nga Facebooku, jo nga një kumtesë. Kur kamera punon më mirë se njoftimi zyrtar, kjo nuk është përparësi e teknologjisë - është matës i shpejtësisë së institucionit.