Në mbi 2.000 metra lartësi mbidetare në Pelister janë vendosur kamera të reja. Qëllimi zyrtar është monitorimi i dhisë së egër dhe kafshëve të tjera të egra - përcaktimi i numrit të tyre, gjendjes shëndetësore dhe potencialit të popullatës në parkun kombëtar.

„Kamerat e reja i vendosëm në një rajon të lartë, mbi 2.000 metra lartësi mbidetare. Qëllimi ynë është ruajtja dhe monitorimi i habitateve të kafshëve, që t'u përmirësohen kushtet për jetë dhe mbijetesë në natyrë”, deklaroi Petar Moshtanovski, i punësuar në institucion.

Por qëllimi i dytë është më interesant se i pari. Drejtori i IP Parku Kombëtar „Pelister” - Manastir, Ivanço Toshevski, tha hapur se një pjesë e kamerave shërben edhe për parandalimin e ngjarjeve të padëshiruara në mal. Dhe se kjo tashmë po jep rezultat: „Me monitorim aktiv u zvogëlua mungesa e higjienës, gjithnjë e më pak mbeturina lënë vizitorët në mal.”

Domethënë - kamerat nuk shikojnë vetëm dhi të egra. Shikojnë edhe njerëz. Dhe qëkur nisën të shikojnë njerëz, mbeturinat në Pelister janë pakësuar.

Ky është një fakt që flet për ne më shumë sesa na vjen mirë. Vite apelesh, tabelash, fushatash dhe thirrjesh për „kulturë sjelljeje në mal” dhanë më pak rezultat se dijenia që dikush po filmon. Toshevski madje falënderoi mediat që i përcollën apelet - por apelet nuk e pastruan Pelisterin. E pastroi kamera.

Nga institucioni njoftojnë edhe projekte të tjera ekologjike. Pyetja që mbetet: a do të sillet Maqedonia ndaj parqeve të veta kombëtare vetëm aty ku ka objektiv, apo ndonjëherë edhe aty ku nuk ka?