Kompania jugkoreane Krafton, firma pas PUBG-së, paralajmëroi edhe 250 milionë dollarë (rreth 215 milionë euro) për Indinë në tre-katër vitet e ardhshme. Me këtë shuma e përgjithshme që planifikon në atë vend kalon 500 milionë dollarë, pasi mbi 250 milionë ka investuar tashmë nga viti 2021 e këtej. Dhe kjo nuk përfshin paratë në fondin e veçantë prej 670 milionë dollarësh që hapi me Naver dhe Mirae Asset në dhjetor të vitit të kaluar, ku firma investoi rreth 137 milionë në mbylljen e parë.

Ajo që vlen të vihet re nuk është shifra, por drejtimi. Krafton thotë hapur se paratë shkojnë jashtë lojërave - në inteligjencë artificiale, robotikë dhe teknologji të thellë. Një kompani gaming që nisi me një titull të vetëm tani sillet si fond investimi me një vend pritës.

Arsyeja është një aritmetikë së cilës askush nuk mund t'i kundërvihet. India ka mbi një miliard abonentë interneti dhe më shumë se 700 milionë përdorues telefonash të mençur. BGMI, versioni i lokalizuar i PUBG-së, ka mbi 260 milionë shkarkime. Kur një produkt të sjell një publik kaq të madh, pyetja e radhës nuk është si të shesësh më shumë kopje, por çfarë tjetër mund t'i shesësh të njëjtit publik.

Rruga deri atje nuk ka qenë e qetë dhe kjo është pjesa që thotë më shumë. Qeveria indiane e ndaloi PUBG Mobile në vitin 2020 së bashku me qindra aplikacione të lidhura me Kinën, mes marrëdhënieve të tensionuara midis Nju Delhit dhe Pekinit. Krafton hyri pastaj me BGMI në vitin 2021, e hodhi poshtë Tencent Games si botues për tregun indian dhe i zhvendosi serverët te Microsoft Azure. Me fjalë të tjera: për të mbetur në vend, firma duhej ta priste dukshëm lidhjen kineze.

Nuk ndihmoi menjëherë. Në vitin 2022 u ndalua edhe vetë BGMI, ndërsa qeveria federale i lejoi kthimin vetëm vitin pasues, dhe atë me provë tremujore. Një firmë që dy herë e dëbuan nga tregu tani investon atje gjysmë miliardi. Kjo nuk është besim te rregullatori - kjo është llogari se 700 milionë telefona vlejnë më shumë se rreziku.

Deri tani Krafton ka investuar në rreth 18 kompani indiane, mes tyre Nodwin Gaming, Loco, Pratilipi, Kuku FM dhe One Impression, ndërsa vitin e kaluar bleu edhe studion Nautilus Mobile nga Puna. Njoftimi i ri erdhi pas takimit të kryetarit të Kraftonit, Çang Bjung-xhu, me kryeministrin indian Narendra Modi në Nju Delhi.

Pikërisht ai takim është poenta. Investimi shpallet po atë ditë kur njeriu i firmës ulet me njeriun që i nënshkruan ndalimet. Në Ballkan atë skenë e njohim nga afër - dallimi është se këtu në dhomë futet gjysmë miliardi, prandaj i zoti i shtëpisë dëgjon.