Në fillim të vitit 2022 Bolt vlente 11 miliardë dollarë. Sot vlen 300 milionë - rënie prej 97 për qind. Kompania për përpunimin e pagesave online tani po mbledh financim urë prej më së shumti 27 milionë dollarësh, që është më pak se gjysmë përqindje e vlerës së vjetër.

Rajan Breslou, i cili e themeloi firmën në vitin 2014 në moshën 19-vjeçare pasi braktisi Stenfordin, u kthye në postin e drejtorit ekzekutiv vitin e kaluar pas një sërë kontestesh gjyqësore me investitorët. Ai nuk dorëzohet. „Besoj në Bolt më shumë se sa mund të imagjinojë kushdo. Besoj se Bolt ia vlen të shpëtohet“, deklaroi ai.

Kësaj deklarate i shtoi edhe para të vetat - 5 milionë dollarë hyn personalisht në raund. Pjesa tjetër duhet të vijë nga investitorët ekzistues, dhe këtu nis pjesa më serioze e historisë.

Raundi ka klauzolën „paguaj ose dil“. Kush nga rreth njëqind investitorët e deritanishëm nuk merr pjesë tani, humb pjesë të madhe të kuotës së vet. Kjo nuk është ftesë, është ultimatum - dhe zakonisht shkruhet kur themeluesi nuk është i sigurt se paratë do të vijnë vetë. Breslou vlerëson se do të mblidhen së paku 15 milionë, por pranon se nuk pritet të hyjnë të gjithë.

Financimet urë janë para afatshkurtra deri te raundi i ardhshëm i madh, dhe merren për dy arsye: ose kompania ecën mirë dhe i duhen gjashtë deri dymbëdhjetë muaj deri te objektivi tjetër, ose po i mbaron paraja. Breslou refuzoi të thotë sa para i kanë mbetur Boltit. Pretendon se po i afrohet përfitueshmërisë dhe se po kthehet në rritje pas vitesh me të ardhura në rënie.

Në njoftim thuhet se paratë do të shërbejnë edhe për „pastrimin e detyrimeve të trashëguara“. Në pyetjen se çfarë do të thotë saktësisht kjo, Breslou nuk u përgjigj. Kur një kompani i përshkruan borxhet e veta si të trashëguara - nga kush i ka trashëguar, nëse themeluesi është i njëjti njeri?

Kjo vjen dy vjet pas përpjekjes për një raund prej 450 milionë dollarësh me vlerësim prej 14 miliardësh. Ajo marrëveshje u shemb pasi investitorët ekzistues, mes tyre BlackRock dhe Hedosophia, paraqitën padi për ta bllokuar - pasi u zbulua se një investitor i renditur si mbështetës kryesor fare mohonte se merrte pjesë, ndërsa një tjetër ofroi 250 milionë dollarë në „kredi marketingu“ në vend të parave. Padia më vonë u tërhoq nga të gjitha palët. Këtë herë, thotë Breslou, bordi dhe shumica e aksionarëve me përparësi e miratuan raundin.

Shifra që thotë më së shumti nuk është asnjëra nga miliardat: në vitin 2021 Bolt kishte 900 punonjës, sot ka rreth 60. Breslou këtë nuk e paraqet si problem, por si përparësi - inteligjenca artificiale, thotë ai, e bën kompaninë më efikase: „Bëjmë ndoshta dhjetë herë më shumë, dorëzojmë dhjetë herë më shpejt falë IA-së.“ Kushdo që ka pushuar 93 për qind të njerëzve do të donte që kjo fjali të ishte e saktë.

Ambicia e tij mbetet e madhe: „Mendoj se mund të jemi Lyft-i i Uber-it që është Stripe.“ Vëreni modestinë në krahasim - Lyft është i dyti, jo i pari. Ka miq, thotë, që i kanë ofruar nga 10 milionë dollarë për të themeluar diçka të re dhe për ta lënë këtë makth. Nuk do.