Kremlini për herë të parë në historinë e parakalimit për Ditën e Fitores ua tërhoqi akreditimet gazetarëve të huaj. Sipas "Der Spiegel", gazetarët nga ARD dhe ZDF gjermane, Sky News britanike, AFP-ja franceze, RAI-ja italiane dhe NHK-ja japoneze u njoftuan se nuk do të kenë qasje më 9 maj në Moskë. Të lejuara janë vetëm mediat ruse.

Shpjegimi i zëdhënësit të Kremlinit është konciz: "Për shkak të situatës aktuale, formati i mbulimit të parakalimit për Ditën e Fitores është ndryshuar." Përkthim - nuk duam kamera të jashtme në një skenë ku po përpiqemi të dëshmojmë se gjithçka është në rregull.

Kjo është hera e parë që nga fillimi i parakalimit që Moska tërheq akreditime të dhëna më parë. Nuk po refuzon kërkesa të reja - po tërheq ato të konfirmuara. Sinjal që s'mund të lexohet ndryshe veçse pamjet e këtij viti duhet të jenë nën kontroll të plotë redaksional të Kremlinit. Optika e parakalimit në epokën e droneve, ashtu siç e mendojnë propagandistët rusë.

Parakalimi i 9 majit në Moskë gjithmonë ka anë politike, por këtë vit është regji e pastër. Mediat e huaja nuk lejohen sepse çdo kuadër jashtë fokusit të paracaktuar mund të interpretohet në dëm të narrativës. Në Ballkan e njohim këtë: kur institucioni ua mbyll derën kamerave të pavarura, nuk do të thotë se s'ka çfarë të shihet. Do të thotë se ata që shohin trajtohen si kërcënim.