Një nxënës katërmbëdhjetëvjeçar u lëndua me mjet të mprehtë në një shkollë fillore në rajonin e Bit Pazarit në Shkup. E sulmoi shoku i tij i klasës, ndërsa incidenti ndodhi në tualetin e shkollës.

Sipas MPB-së, më 24 shtator në orën 13 në SPB Shkup, 43-vjeçarja F.A. paraqiti se po atë ditë rreth orës 9 djali i saj 14-vjeçar ishte sulmuar nga një shok klase. Djali mori një prerje në pjesën e dorës. Policia thotë se po ndërmerr masa për zbardhjen e rastit. Më shumë detaje për shkakun, për mjetin dhe nëse ndonjë i rritur ishte afër, për momentin nuk ka.

Ndërmjet sulmit dhe paraqitjes kaluan katër orë. Kush e pa fëmijën me dorë të prerë gjatë mësimit dhe çfarë bëri shkolla ndërkohë? Këto janë pyetje për drejtorin dhe për Ministrinë e Arsimit, jo për nënën që shkoi në polici.

Po atë ditë MPB-ja publikoi edhe një rast tjetër nga një shkollë. Në Koçan, në zhveshtoren e sallës sportive të një shkolle fillore, një fëmijë gjashtë vjeç e gjysmë u sulmua fizikisht, u zhvesh dhe u filmua me orë të mençur nga disa fëmijë më të mëdhenj. Janë njoftuar prokurori publik dhe Qendra për Punë Sociale.

Shkolla duhet të jetë vendi më i sigurt për një fëmijë jashtë shtëpisë. Kur dhuna mes fëmijëve arrin në buletinet e policisë, pyetja nuk është më vetëm kush goditi, por edhe kush duhej të kishte kujdes dhe pse nuk pati.