Shkupi këto ditë është nikoqir i Kampionatit Evropian të vallëzimit, i cili nga 21 deri më 29 shtator mbahet në Qendrën Sportive „Boris Trajkovski“. Më shumë se 2.900 garues nga 26 vende evropiane paraqiten në balet klasik, repertor baletik, vallëzim xhaz, vallëzim modern e bashkëkohor dhe improvizim skenik, në kategoritë solo, duo, grupore dhe formacione.

Dita qendrore ishte 25 shtatori, me Paradën e Kombeve në T-Arena. Pjesëmarrësit defiluan me flamujt e vendeve të tyre, ndërsa paradën e pasuan programi gala dhe paraqitjet garuese. Po atë ditë në Shkup u mbajt edhe Kupa Botërore në vallëzim produksioni.

Kryetari Orce Gjorgjievski e shfrytëzoi momentin për një paralajmërim: vitin e ardhshëm Shkupi do të jetë nikoqir edhe i Kampionatit Botëror të vallëzimit. „Shkupi sot është një skenë e madhe evropiane ku takohen kulturat, krijohen miqësi të reja dhe ndahet një pasion i përbashkët, dashuria për vallëzimin“, tha ai, duke shtuar se kampionati botëror është konfirmim se qyteti ka kapacitet për ngjarjet më të mëdha ndërkombëtare.

Mijëra valltarë të rinj, trajnerë, gjyqtarë dhe vizitorë në një qytet për një javë janë publik i vërtetë ndërkombëtar. Nëse kjo u ndie edhe te hotelet, restorantet dhe transportuesit, shifra për momentin nuk ka.

Kampionati botëror vitin e ardhshëm do të sjellë mysafirë të rinj nga e gjithë bota. Në sallë skena do të shkëlqejë. Pyetja është nëse Shkupi do t'i presë valltarët e botës me të njëjtin shkëlqim edhe jashtë sallës, në trotuare, në transportin publik dhe në rrugët nëpër të cilat do të shëtisin.