Anthropic u zotua të shpenzojë 11,6 miliardë dollarë (rreth 10,2 miliardë euro) në infrastrukturën cloud të Akamai-t në shtatë vitet e ardhshme. Kjo është marrëveshja më e madhe në historinë e Akamai-t, dhe më shumë se gjashtë herë më e madhe se marrëveshja prej 1,8 miliardë dollarësh për të cilën u shkrua në maj.

Por shifra ka një yll. Sipas dokumentit që Akamai ua dorëzoi rregullatorëve të bursës, detyrimi vlen vetëm nëse Akamai i përmbush kushtet për dorëzim dhe disponueshmëri të shërbimit, ndërsa të dyja palët mund ta ndërpresin marrëveshjen në kushte të caktuara. Sivjet të ardhura prej saj nuk ka. Udhëheqja e Akamai-t në thirrjen me investitorët paralajmëroi 150 deri 300 milionë dollarë në vitin 2027, e atë nga gjysma e dytë, ndërsa ritëm vjetor prej rreth 1,7 miliardë dollarësh vetëm nga fundi i vitit 2028.

Për ta ndërtuar kapacitetin e nevojshëm, Akamai planifikon të investojë rreth 5,5 miliardë dollarë (rreth 4,8 miliardë euro), ndërsa shpenzimeve kapitale për këtë vit u shton edhe 1,7 miliardë dollarë për komponentë të blerë paraprakisht. Me fjalë të tjera, furnizuesi së pari shpenzon, e pastaj pret që klienti të paguajë.

Pjesa më interesante është në shkronjat e vogla. Akamai i lëshoi Anthropic-ut një varant për aksione prioritare pa të drejtë vote, që mund të shndërrohen në 7,7 milionë aksione të zakonshme, deri në rreth 5 për qind të kompanisë, me çmim 111,33 dollarë për aksion. Rreth 2 për qind i takojnë me pagesën e parë. Çdo 3 miliardë dollarë detyrim shtesë zhbllokojnë edhe rreth 1 për qind, që do të thotë se marrëveshja mund të rritet deri në rreth 20 miliardë dollarë (rreth 17,5 miliardë euro).

Ky është version i përmbysur i marrëveshjeve rrethore që e shënuan garën për inteligjencën artificiale. Zakonisht furnizuesi investon në kompaninë e IA-së, ndërsa ajo pastaj ia kthen paratë si klient. Këtu furnizuesi i jep klientit pjesëmarrje pronësore që rritet me çdo dollar të shpenzuar. Të njëjtën formulë e përdori AMD me OpenAI. Kur dy nga laboratorët më të mëdhenj të IA-së marrin aksione sepse blejnë, sa nga marrëveshjet rekord janë kërkesë e vërtetë, e sa karusel kontabël?

Ka edhe një detaj teknik që e veçon marrëveshjen. Bëhet fjalë për procesorë (CPU), e jo për çipat grafikë (GPU) rreth të cilëve sillet gjithë bujë, një bast në pjesën më pak joshëse të infrastrukturës, tani kur agjentët e IA-së po marrin gjithnjë e më shumë detyra operative. Tregu tashmë votoi: aksionet e Akamai-t u hodhën deri në 17 për qind në tregtimin pas mbylljes së bursës.