Një histori që shumëkush e mendonte të mbyllur, hapet sërish. Policia britanike Tems Vali e ka rihapur hetimin ndaj ish-princit Endry për akuzat e Virxhinia Xhufre, e cila me vite pretendonte se ishte abuzuar seksualisht. Hetuesit udhëtojnë në SHBA për të marrë në pyetje të afërmit e saj, kërkojnë dokumente nga Skotland Jardi dhe nga Ministria amerikane e Drejtësisë lidhur me rastin Xhefri Epstin, dhe paralajmërojnë marrje në pyetje të njerëzve të afërt me Endryun - sigurimin, dëshmitarët, viktimat.

Shkasi është i hidhur: hetimi u forcua një vit pas vdekjes së Xhufres. Gruaja që e akuzonte më me zë s'është më, kurse sistemi që me dekada heshti tani fillon të lëvizë. Kjo është skema që Ballkani e njeh mirë - drejtësia arrin vetëm pasi bëhet tepër vonë për atë që e kërkoi. Sa herë i kemi parë institucionet të zgjohen pikërisht kur s'ka më kush ta shijojë zgjidhjen?

Endryu ndërkohë e pagoi çmimin të paktën në letër. Mbreti Çarls III ia hoqi titujt, e nxori nga Royal Lodge dhe e largoi nga familja aktive mbretërore. Por ai vazhdon të marrë një shumë vjetore dhe një kompensim për zhvendosje - një dënim që për një njeri të zakonshëm do të thoshte fund, kurse për një anëtar të një shtëpie mbretërore do të thotë vetëm një rregullim tjetër i rehatisë. Një titull i hequr s'është e njëjta gjë me përgjegjësinë para gjyqit.

Pyetja që rri pezull mbi tërë historinë s'është nëse Endryu e humbi statusin - kjo tashmë ka ndodhur. Pyetja është nëse ndonjëherë do të përgjigjet para ligjit, apo hetimi i rihapur do të përfundojë si kaq të tjerë: me shumë udhëtime, dokumente dhe marrje në pyetje, e pa asnjë ditë të vetme përgjegjësie. Pushteti ka një mënyrë t'i mbijetojë të gjitha hetimeve. Nëse këtë herë do të jetë ndryshe, do ta shohim.