„Hara haçi bu" - një zakon japonez që do të thotë të ndalosh së ngrëni kur je rreth 80 për qind i ngopur. Vjen nga Okinava, një rajon i njohur për jetëgjatësinë e banorëve të vet, dhe nuk kërkon dieta, ndalesa as numërim kalorish. Vetëm një gjë: ndalo para se të jesh tej mase plot.

Pas saj qëndron një fiziologji e qartë. Nutricionistja Paloma Kintana shpjegon se trurit i duhet kohë t'i marrë sinjalet e ngopjes - përmes neurotransmetuesve në zorrë, përmes shtrirjes së stomakut, përmes rritjes së insulinës dhe leptinës. Ato sinjale udhëtojnë ngadalë, zakonisht disa minuta. Nëse ha shpejt e deri te kafshata e fundit, trupi nuk ka pasur kohë të të thotë se tashmë mjafton.

E pse vazhdojmë të hamë kur nuk jemi të uritur? „Tipikja 'gjithmonë ka vend për ëmbëlsirë' tregon se shpesh hamë për kënaqësi, jo sepse trupi kërkon më shumë energji", thotë Kintana. Testi: nëse sallata që ka mbetur të duket e mërzitshme për t'u përtypur, ka gjasa që uria e vërtetë të ketë kaluar. Por ëmbëlsira dhe ushqimi i përpunuar e zgjojnë artificialisht oreksin sërish.

Praktika është e thjeshtë, por kërkon vëmendje. Ha ngadalë, bëj pauza mes kafshatave dhe pyet veten në mes: a do të merrja edhe një porcion të gjellës kryesore? Nëse përgjigjja është jo, atëherë as ëmbëlsira nuk të duhet. Nuk është magji as rrallësi që duhet ta blesh - është një zakon që kushton zero, e gjyshet tona e dinin prej dekadash me një emër tjetër: ngrihu nga tryeza pak i uritur.