Hap Instagramin dhe atje është - shtëpia e përsosur. E ndriçuar sikur të jetë fotografuar për revistë, asnjë kabllo në pamje, asnjë send në vend të gabuar. Mendon se duhet vetëm ta përsërisësh atë te vetja. Dhe pastaj e bën, e diçka nuk funksionon.

„Problemi nis kur pushojmë së pyeturi çfarë na duhet neve dhe fillojmë të kopjojmë shtëpinë e një njeriu tjetër", thotë dizajnerja e brendshme Ana Utrilja. Trendet mund të tregojnë ide, materiale dhe kombinime. Ajo që nuk mund të bëjnë është ta zëvendësojnë mënyrën si jeton - sepse shtëpia nuk është një pamje e ngurtë, por një hapësirë në lëvizje.

Shtëpia për pesë minuta mysafirësh, përballë shtëpisë për 364 ditë

Me vite shtëpi e bukur do të thoshte shtëpi e përsosur. Utrilja e hedh poshtë atë përkufizim drejtpërdrejt: „Na shitën se shtëpi 'e bukur' është ajo që i reziston mirë një vizite pesëminutëshe". Kundërpërgjigjja e saj është më interesante: „Unë preferoj të mendoj për atë që e jeton 364 ditët e tjera të vitit". Kur ndryshon ajo perspektivë, ndryshojnë edhe vendimet. Fillon të vlerësosh atë që ta lehtëson ditën, jo atë që duket mirë në fotografi.

Personaliteti nuk blihet

Ekziston besimi se një shtëpi me karakter kërkon copa unike ose investime të mëdha. Utrilja nuk pajtohet: „Nuk janë copat e veçanta. Çështja është që shtëpia të tregojë diçka për atë që jeton në të". Kjo e ndryshon plotësisht qasjen - nuk bëhet fjalë për mbledhje sendesh mbresëlënëse, por për një varg vendimesh koherente. „Më interesojnë shtëpitë ku gjithçka është aty ku duhet të jetë", thotë ajo, jo për estetikë por për funksion.

Fotografia është një çast, shtëpia është çdo ditë

Gabimi më i shpeshtë, sipas saj, është „të harrosh se fotografia është një çast, ndërsa shtëpia është çdo ditë". Rrjetet e tregojnë rezultatin, por jo procesin. „Një foto nuk të tregon ku hidhen çantat kur vjen dikush nga shkolla", thotë Utrilja. As kaosin e një mëngjesi të zakonshëm, as darkën e shpejtë të improvizuar. „Shtëpitë e vërteta kanë nxitim, zhurmë, por edhe heshtje." Nëse kjo nuk merret parasysh, fitohet një hapësirë që duket mirë dhe funksionon keq: „Përfundon duke jetuar për ta mirëmbajtur shtëpinë, në vend që shtëpia të kujdeset për ty".

Organizimi i hapësirës fiton mbi gjithçka tjetër

Mund ta qëllosh stilin dhe ta humbasësh bazën. Organizimi i hapësirës është ai që vërtet përcakton si jetohet në një ambient - „një organizim që bën ditën të rrjedhë" ka ndikim më të madh se çdo trend. Nuk bëhet fjalë vetëm ku do të vendosen mobiljet, por për lehtësimin e lëvizjes, heqjen e pengesave dhe optimizimin e përdorimit. Pyetja që duhet ta udhëheqë gjithë procesin është e thjeshtë: si dua të jetoj këtu?

Ruajtja nuk është shtojcë

Rregulli nuk është çështje estetike, por çështje mirëqenieje. „Shumë herë problemi nuk është estetik: është marrëdhënia që kemi me shtëpinë", thotë dizajnerja. Nëse nuk ka hapësirë të mjaftueshme ruajtjeje, çrregullimi shfaqet vetvetiu, e bashkë me të edhe ndjesia e kaosit. Prandaj ruajtja duhet planifikuar që nga fillimi - e integruar, e arritshme dhe e përshtatur me rutinën, e jo të shtohet në fund kur gjithçka është vendosur tashmë.

Si të marrësh nga trendi pa iu dorëzuar

Utrilja nuk kërkon heqje dorë: „Nuk është e nevojshme të heqësh dorë nga asgjë". Ajo që duhet të ndryshojë është radha. „Duhet t'i hiqet roli kryesor" - domethënë të mos nisesh nga trendi. Së pari analizohet shtëpia, pastaj vendoset çfarë do të shtohet. „Trendi jep ide, nuk duhet të marrë vendime në vend të teje." Rezultati atëherë nuk varet nga ajo që vishet atë vit, por i përgjigjet një njeriu, jo modës.

Qëllimi nuk është të impresionosh

Gjatë kohë rregullohej duke menduar për të tjerët - për vizitën, për fotografinë, për miratimin e jashtëm. „Shtëpia nuk duhet të jetë vendi ku e harxhon gjithë energjinë tënde", thotë Utrilja. Duhet të jetë e kundërta - një hapësirë që të mbush. Kjo do të thotë komodja para të përsosurës, dhe të kuptuarit se një shtëpi e jetuar nuk është shtëpi e lënë pas dore. Ajo është shtëpi e vërtetë.

Fjalia e saj e fundit është edhe më e mira: „Trendet ndryshojnë dhe shijet po ashtu, por një shtëpi që ta lehtëson jetën, që të lë të pushosh, që nuk kërkon të jetë e përsosur që ti të kënaqesh në të - e tillë rrallë pushon së të pëlqyeri". Vështirë të kundërshtohet - sidomos në një vend ku rinovimi i një banese shpesh planifikohet sipas asaj se çfarë do të thonë mysafirët, e jo sipas asaj se ku do të lihen këpucët.