Partia e një ministri në Qeverinë e Maqedonisë publikoi një tekst me të cilin lavdëron Ratko Mlladiqin. Partia Demokratike e Serbëve në Maqedoni, kryetari i së cilës Ivan Stoilkoviq është ministër i vetëqeverisjes lokale, në faqen e vet në Facebook e përshkroi Mlladiqin si „ushtar, gjeneral dhe njeri që ia kushtoi jetën shërbimit ndaj ushtrisë dhe popullit të cilit i takonte“.

Ratko Mlladiqi është dënuar me burgim të përjetshëm për gjenocid, krime lufte dhe krime kundër njerëzimit. Mes tyre është edhe Srebrenica, ku u vranë mbi 8.000 burra dhe djem. Ky nuk është interpretim i diskutueshëm historik - është aktgjykim i formës së prerë.

Sipas asaj që është shkruar, autore e tekstit është Tatjana Domazet, për të cilën thuhet se është bibliotekare në Bibliotekën Kombëtare të Serbisë në Beograd. Përveç kësaj, drejtori i Agjencisë për realizimin e të drejtave të bashkësive, Dalibor Kitanoviq, publikoi një fotografi të gjeneruar me inteligjencë artificiale, në të cilën Mlladiqi paraqitet me personalitete historike serbe nën titullin „Gjeneralët e ushtrisë qiellore“.

Reagimet dhe heshtja

Nga LSDM reaguan se për Stoilkoviqin „lideri i serbëve boshnjakë Ratko Mlladiq - i dënuar për gjenocid, krime lufte dhe krime kundër njerëzimit - është madhështi dhe hero“, duke e vendosur këtë në një kontekst më të gjerë të agjendës pro-ruse në pushtet. Kërkuan që Mickoski të thotë a është ky qëndrim i Qeverisë.

Nga BDI mesazhi ishte i ndryshëm në ton, i njëjtë në thelb: „Nuk flasin për histori. Romantizojnë një person të dënuar për disa nga krimet më të rënda të kryera në Evropë pas Luftës së Dytë Botërore.“ Vlen, nga ana e vet, e dënoi glorifikimin, por në kumtesë tregoi me gisht drejtuesin e institucionit - jo edhe partinë e Stoilkoviqit.

Nga VMRO-DPMNE - asgjë.

Pyetja që mbetet e hapur

Stoilkoviqi nuk është funksionar anonim partiak. Ai është ministër në këtë Qeveri, kurse partia e tij është pjesë e koalicionit qeverisës. Kur partia e një ministri i jep publikisht nderime një kriminel lufte të dënuar, pyetja „a është ky qëndrimi i Qeverisë“ nuk është retorikë partiake - është pyetje së cilës kryeministri ka detyrim t'i përgjigjet.

Heshtja gjithashtu është përgjigje, vetëm se zgjat më shumë derisa të kuptohet cila.

Maqedonia nuk është Bosnja dhe nuk ka Srebrenicën e vet. Por Ballkani e njeh këtë skenë përmendsh: aktgjykimi është aty, dokumentet janë aty, varrezat janë aty - dhe prapëseprapë çdo disa vjet dikush përpiqet ta kthejë njeriun në uniformë dhe ta nxjerrë nga salla e gjyqit. Dallimi këtë herë është se këtë nuk e bën një faqe margjinale, por faqja e një partie me kolltuk ministror.