Torcida këndoi për Auschwitz dhe Hitlerin në Split, ndërsa themeluesit e HDZ-së kërkojnë hetim nëse pas kësaj qëndron Serbia

Hajduku u kthye në fazën kryesore të një gare evropiane pas 16 vjetësh, Poljudi ishte plot, ndërsa „të Bardhët“ e mposhtën Ajaxin me 2:1. Kjo duhej të ishte mbrëmja që Spliti do ta mbante mend. Në vend të kësaj, Evropa do ta mbajë mend korzon e Torcidës para ndeshjes në Ligën e Konferencës - dhe parullat që dëgjoheshin nëpër rrugë.

„Shkel, shkel hebrenjtë“, „Auschwitz, Auschwitz“, „Ngrihu, Adolf“ dhe „Hajde, hajde, ustashë“. Në krye të kolonës ecte një Golf i verdhë me një arkivol në çati, mbi të cilin shkruhej Ajax. Arkivol me emrin e klubit holandez tifozët e Hajdukut kishin bartur edhe në vitin 1995, kur dy klubet u takuan në çerekfinalen e Ligës së Kampionëve. Tridhjetë e një vjet më vonë, skenari u përsërit deri në detaj.

Policia e Splitit arrestoi katër persona nën dyshimin për nxitje publike të dhunës dhe urrejtjes, ndërsa jozyrtarisht kërkohen edhe të paktën dhjetë - sipas informacioneve, njerëz nga maja e Torcidës, disa prej të cilëve tashmë të njohur për drejtësinë. Neni 325 i Kodit Penal kroat për këtë parashikon deri në tre vjet burg, ndërsa për organizimin e një grupi që nxit urrejtje - nga gjashtë muaj deri në pesë vjet. Një tifoz 24-vjeçar, i cili nga tribunat drejt stolit dhe lojtarëve të Ajaxit bërtiste një sharje antisemite, tashmë mori dhjetë ditë burg nga gjykata për kundërvajtje. Atij iu matën 1,66 promil alkool në gjak.

Bota e vuri re. Ynet dhe Israel Hayom izraelite shkruan për antisemitizëm të drejtuar ndaj „klubit hebre“ dhe përfaqësuesit të tij izraelit Oscar Gloukh. Telegraph britanik kujtoi listën e gjatë të dënimeve që Federata Kroate e Futbollit i ka marrë për sjelljen e tifozëve. Shkruan edhe media polake, holandeze, greke dhe rumune, ndërsa lajmi arriti deri në Kili. Nga fqinjësia e transmetuan RTS serb, RTCG malazez dhe disa media në Bosnjë e Hercegovinë, ndërsa në Maqedoni „Sloboden peçat“ e publikoi edhe incizimin.

Hajduku kërkoi falje, por falja kishte të bënte me ngjarjet në stadium - piroteknikën për shkak të së cilës ndeshja u ndërpre në minutën e 77-të, kur lojtarët e lanë fushën për shkak të tymit të dendur. „U kërkojmë falje edhe organizatorit të garës edhe udhëheqjes dhe lojtarëve të Ajaxit, të cilët ishin dëshmitarë të skenave për të cilat nuk duam që Evropa të na mbajë mend“, porositën nga klubi. Parullat nga korzoja policia i heton veçmas. Qeveria kroate e dënoi ashpër ngjarjen, ndërsa presidenti Milanoviq kërkoi reagim urgjent nga policia, prokuroria dhe gjykatat.

Pastaj erdhi pjesa më interesante. Bashkësia e themeluesve të HDZ-së „Dr. Franjo Tuđman“ kërkoi që shërbimet e sigurisë të përcaktojnë nëse incidentet ishin të rastësishme apo „të regjisuara“, me qëllim që të konfirmohen tezat e „botës serbe“. Ata që e krijuan incidentin e turpshëm „nuk janë tanët“, porositën ata, dhe nuk janë më të mirë se ata që për vite ndërtojnë imazhin e „Kroacisë fashiste“.

Logjika është e njohur për gjithë Ballkanin. Kur dhjetëra tifozë të tu në mes të rrugës bërtasin „Ngrihu, Adolf“, është më lehtë të pyesësh kush i regjisoi se sa kush i edukoi. Fytyrat janë në incizime, zërat janë të qartë, arkivoli është rekuizitë me traditë nga viti 1995 - ndërsa një pjesë e reagimeve të para politike kërkojnë dorë nga jashtë. A beson vërtet dikush në Zagreb se edhe atë arkivol e ka ngarë një shërbim i huaj?

Tani radhën e ka drejtësia kroate. Neni 325 është në fuqi, policia ka incizimet, ndërsa një pjesë të emrave tashmë i di. A do të përfundojë gjithçka me nga dhjetë ditë burg dhe gjoba nga disa qindra euro - apo me diçka që vërtet do të ketë peshë? Evropa, të paktën këtë javë, po ndjek.