Камениот мост, симболот на Скопје што ги поврзува плоштадот „Македонија“ и Старата скопска чаршија, повторно свети. Мостот доби ново декоративно и архитектонско осветлување што ги нагласува камените сводови – по години во кои навечер тонеше во мрак.

Зошто во мрак? Затоа што осветлувањето со години било во лоша состојба. Од некои светилки останале само кабли, бидејќи самите светилки биле украдени, а речиси сите светла покрај патеката во внатрешниот дел на мостот биле или демолирани или однесени. Ова е прва ревитализација на осветлувањето на мостот во последните неколку децении.

Светлото го донесе Есенлер. Проектот не го изведе Градот, туку турската општина Есенлер, со која Град Скопје во март годинава потпиша Протокол за пријателство и заедничка соработка. Градот ѝ ја доверил обврската за поставување на осветлувањето, а општината Есенлер, како донатор, го избрала изведувачот преку турскиот систем за јавни набавки. Кога беше најавен проектот, градоначалникот Орце Ѓорѓиевски соопшти дека трошокот ќе го покрие Македонско-турската комора МАТТО. Од Градот сега појаснуваат дека комората била логистика и олеснувач на договорот, а донатор е Есенлер.

Градоначалникот на Есенлер, Мехмет Тевфик Гоксу, работите ги објави на социјалните мрежи. „Привршуваме со работите за осветлување на историскиот Камен мост во Скопје, кој се наоѓа над реката Вардар, а бил завршен во времето на султанот Мехмед II Освојувачот и со години беше во темнина. Нашето историско наследство сега ќе го осветлува Скопје и со својата светлина“, напиша тој.

Мостот е убав и навечер. Но две прашања остануваат отворени. Колку чинеше осветлувањето – во соопштенијата нема износ. И кој ќе ги чува новите светилки од истите раце што ги однесоа старите? Ако одговорот е „никој“, за неколку години повторно ќе чекаме донатор.