Додека целата индустрија на вештачка интелигенција зборува за тоа колку се „паметни” нејзините агенти, една компанија заработува пари на спротивното прашање: каде овие агенти лажат, мамат и не ја завршуваат работата. Patronus AI штотуку доби 50 милиони долари (околу 46 милиони евра) во нова рунда на финансирање.

Идејата е едноставна но недостасуваше. Patronus гради симулирани дигитални светови – копии на вистински сајтови и внатрешни системи – во кои ВИ агентите се тестираат пред да се пуштат во вистинскиот свет. Слично на тоа како што самоуправувачките автомобили се вежбаат во синтетички симулации пред да излезат на улица. Целта е да се фати моментот кога еден агент ќе го „скрати” патот наместо да ја заврши задачата како што треба.

Рундата ја предводеше фондот Greenfield Partners, со учество и на Lightspeed, Datadog и Samsung, со што вкупно собраните средства достигнуваат 70 милиони долари. Компанијата ја основаа поранешни истражувачи од Meta во 2023 година, а приходите ѝ пораснале 15 пати за една година. Меѓу клиентите се речиси сите водечки ВИ лаборатории.

„Сакаме да создадеме средина во која можеш да пуштиш агент што ќе работи 10 часа, 10 дена или 10 недели”, вели основачот Ананд Канапан. Инвеститорот Глен Соломон е подиректен: „Patronus е навистина добар во фаќањето на триковите и во тоа да ги држи моделите одговорни.”

Тука се крие пошироката поука. Кога некој заработува 50 милиони на проверка дали туѓите ВИ системи всушност функционираат, тоа значи едно: индустријата сама признава дека нејзините производи не се толку доверливи колку што рекламите тврдат. Најголемиот конкурент на Patronus не е друг стартап, туку внатрешните тимови на самите ВИ лаборатории – оние што би требало да го прават ова, но очигледно не им оди доволно добро.