Компанијата за одбранбена технологија Anduril преговара за нова инвестиција што би ја проценила на 100 милијарди долари – речиси двојно повеќе отколку пред само неколку месеци. Уште во мај годинава фирмата собра 5 милијарди долари при проценета вредност од 61 милијарда. Сега бројката скокна за уште 40 милијарди. Тоа не е раст на компанија, тоа е раст на апетит.

За да се сфати брзината: во јуни 2025-та Anduril во една рунда беше вреднувана на 30,5 милијарди долари. За една година вредноста на хартија ѝ се зголеми повеќе од трипати. А сето тоа додека фирмата, според изворите, размислува раундот да го подели на две транши што би можеле да се затворат во истата година – начин парите да пристигнат побрзо отколку што компанијата стигнува да ги потроши.

Има ли зад бројките нешто реално? Приходите на Anduril во 2025-та изнесувале 2,2 милијарди долари, повеќе од двојно во однос на претходната година. Тоа е вистински бизнис – дронови, автономни системи, воена електроника – а не само презентација. Но разликата меѓу приходи од 2,2 милијарди и проценета вредност од 100 милијарди е бездна што ја пополнува само една работа: верувањето дека војната е раст-индустрија.

Тоа верување го делат тешки имиња. На списокот на инвеститори се Thrive Capital, Andreessen Horowitz, Founders Fund, ICONIQ и уште неколку фондови. Меѓу нив, според базата PitchBook, се појавува и актуелниот потпретседател на САД Џеј Ди Венс – политичар кој истовремено ги крои одбранбените приоритети на земјата и има интерес во фирма што од тие приоритети профитира. Кај нас за помалку од тоа паѓаат влади.

Anduril не е осамен случај. Ризичниот капитал во одбранбената технологија во првата половина на 2026-та надмина 12 милијарди долари – повеќе отколку за цела претходна година, кога изнесуваше околу 10 милијарди. Парите што порано бегаа од оружје сега трчаат кон него. Инвеститорите не се разбудија поради светот – тие пресметаа дека светот нема да се смири наскоро.

Самата компанија останува воздржана. „Не се донесени никакви одлуки за какво било идно финансирање, а секој што тврди дека ги знае условите, структурата, цената или тајмингот шпекулира или е погрешно информиран”, соопштија од Anduril. Стандарден јазик за фирма што сака да ги остави сите опции отворени – и што знае дека следната бројка најверојатно ќе биде уште поголема.