Армијата на Република Македонија годинава ќе добие сериозно засилување – вкупно 42 борбени возила од типот „Страјкер“, набавени од Соединетите Американски Држави. Ова го потврди министерот за одбрана Владо Мисајловски, кој појасни дека веќе 17 возила се наоѓаат на пристаниште во Солун и чекаат техничка процедура за финална испорака.

Според Мисајловски, станува збор за технички амандман на веќе потпишаниот договор, кој е побаран од американска страна и се однесува на инсталација на целосната опрема и обуката на персоналот.

– Договорот за 42 борбени возила „Страјкер“ е потпишан и е во целост валиден. Ова е технички аранжман што го бараат САД, со цел возилата да бидат целосно опремени и подготвени за употреба. Оваа година сите возила ќе пристигнат – изјави министерот.

Како што беше појаснето, Министерството за одбрана е краен корисник на возилата, а тие ќе останат трајно во составот на АРМ. Во рамки на процесот е предвидена и целосна обука за нивно одржување и оперативна употреба.

Набавката на „Страјкерите“ претставува еден од најзначајните чекори во модернизацијата на Армијата и дополнително ја зајакнува нејзината интероперабилност со НАТО-сојузниците. Од Министерството нагласуваат дека техничкиот амандман не подразбира дополнителни финансиски обврски, туку усогласување со безбедносните и техничките стандарди на САД.