Бигорски е 21. светогорски манастир: историско признание од Света Гора за обителта на македонска почва

Нешто ретко и симболично тежко се случи во Бигорскиот манастир. Цивилниот управител на Света Гора, Алкивијадис Стефанис, на сеноќното бдение по повод манастирската слава – Рождеството на Свети Јован Крстител – изјави дека Бигорски е 21. светогорски манастир. За еден манастир на македонска почва, тоа е признание од највисок ранг во православниот свет.

„Кога сум на Света Гора, ме прашуваат кој ми е омилен манастир, а јас одговарам дека сите дваесет манастири ми се омилени. Отсега ќе велам дека дваесет и еден манастир ми се омилени, додавајќи ја и оваа света обител”, кажа Стефанис. Ова е негова прва посета на Бигорскиот манастир, а неговото доаѓање се оценува како историски значајно – прв пат толку висок претставник од Света Гора стапнува во оваа обител.

Стефанис пристигна заедно со познатиот светогорски старец Антипа, а на бдението на 6 јули присуствуваа голем број монаси и верници од Македонија, како и гости од Света Гора, Грција и Романија. Игуменот на Бигорскиот манастир, епископот Партениј, потенцираше дека „ова е првпат во светата обител, а и во овие наши краишта, да стапне едно толку високо лице”.

Управителот со особено внимание ги пофали возобновувањето на манастирот „од пепелта”, резбите на иконостасот и начинот на кој се раководат младите. Во време кога Македонија ретко добива вести што градат, а не рушат, ова признание за Бигорски е потсетник дека и малите средини можат да создадат нешто што целиот православен свет го гледа со почит. Прашањето е дали ќе умееме да го цениме тоа онолку колку што го цени еден гостин од Света Гора.