Полицијата удри на повеќе локации низ Македонија. Акцијата таргетира организиран нелегален увоз и дистрибуција на ботокси и филери – медицински препарати за естетски процедури кои влегувале во земјата без никакви дозволи.

Обвинителството за организиран криминал соопшти дека се водат интензивни претреси и задржувања на осомничени. Истрагата ги покрива кривичните дела „злосторничко здружување”, „повреда на правата на интелектуална сопственост” и „примање поткуп”.

Неофицијално, над десет лица се задржани, меѓу кои и дерматолози од јавни здравствени установи и приватни ординации. Групата систематски набавувала медицински препарати без дозволи и ги дистрибуирала за естетски третмани. При претресите се запленети значителни количини медицински производи, готовина, мобилни телефони и луксузен автомобил.

Доктори кои работат во клинички центри – фатени со нелегални ботокси. Луѓе им верувале на белиот мантил, а под мантилот – шверц. Колку вакви третмани се направени со непроверени препарати, и кој ќе одговара ако некому му се случи нешто?