Реториката меѓу НАТО и Москва повторно се качи едно скалило погоре – и овој пат зборовите дојдоа од врвот на германските воздухопловни сили. Командантот, генерал-полковник Холгер Нојман, во интервју за британски медиум изјави дека во случај на руски напад врз Алијансата, целите би биле стратешки точки длабоко во Русија: Санкт Петербург, Калининград, полуостровот Кола и Црноморскиот регион.

„Ако дојде до судир, за кој се надевам дека никогаш нема да се случи, ќе го браниме секој сантиметар од нашата територија”, рече Нојман, додавајќи дека за НАТО нема зони со различна безбедност – „НАТО е НАТО до последниот сантиметар”. На прашањето за подготвеноста, одговорот беше уште подиректен: „Да се биде подготвен за вечерва значи – ако некој ме повика сега со таква ситуација, мора да бидеме спремни сега. И спремни сме.”

Пораката што сака да ја испрати е дека Алијансата нема да прави разлика меѓу напад врз мала членка како Естонија и врз голема како Британија – удар врз било која значи одговор од сите. Звучи како цврста гаранција за балтичките сојузници. Но кога еден генерал јавно набројува руски градови како мети, прашањето не е дали зборовите се храбри, туку колку чинат ако некој ги сфати буквално.

За Балканот ваквите изјави не се далечна бучава. Регионот премногу добро памти што значи кога големите сили вежбаат мускули преку туѓи територии и зборови. Секоја ескалација во реториката меѓу Москва и Брисел е чекор поблиску до сценарио во кое малите земји повторно стануваат теренот, а не играчите. Дали некој во овие престолнини размислува што значи „последниот сантиметар” за оние што живеат на линиите меѓу блоковите?