Компанија што му продава сајбер-безбедност на американската влада, а во исто време ги крие сопствените пробиви. Тоа е, накратко, обвинението што поранешен висок функционер на IBM го става на маса – и тоа не на форум, туку како формална пријава на укажувач.

Вилијам Барлоу, до 2019 година потпретседател за разузнавање на закани во IBM, тврди дека компанијата прикрила повеќе пробиви од кинески хакери и не ги известила надлежните. Најтешкиот случај се однесува на самата мрежа на IBM: меѓу 2013 и 2016 година, група поврзана со кинеската влада, позната како APT 10, наводно влегла во системите над 56.000 пати. Внатрешната истрага, според пријавата, нашла речиси 400 компромитирани сметки и околу 200 системи во 18 земји.

Барлоу набројува уште два случаи – кибербезбедносниот стартап Trusteer и здравствената компанија Truven, и двете купени од IBM, и двете наводно пробиени со површна истрага и без вистинско известување. Што е особено непријатно: разузнавачи од петте земји на „Five Eyes” (САД, Британија, Канада, Австралија и Нов Зеланд) го предупредиле IBM за упадот уште во март 2017 година.

IBM возвраќа кратко и студено: „Оваа пријава беше поднесена пред шест години, а Министерството за правда на САД одби да се вклучи. IBM е уверена дека нашите постапки беа во согласност со законот.” Преведено: ништо не докажавте тогаш, нема да докажете ни сега.

Адвокатот на Барлоу го става прстот таму каде боли најмногу: „Не можеш да ѝ продаваш кибербезбедност на федералната влада додека наводно ги имаш истите тие безбедносни проблеми во сопствената компанија.” Дали судот ќе се согласи е едно прашање. Другото, потешкото, е колку други големи имиња го прават истото – молчат за сопствените дупки додека наплаќаат да ги затвораат туѓите.