Наскоро ќе биде познато дали ќе има ново поскапување на електричната енергија од 1 јануари следната година, откако АД ЕСМ ја достави својата понуда за новата цена до Владата. На затворена седница, министрите расправаа дали предложената цена е прифатлива или ќе се бара корекција.

Во моментов, ЕСМ ја продава струјата за домаќинствата по 62 евра за мегават-час, иако вонредните трошоци за производство ја креваат реалната цена над 100 евра за мегават-час. Оваа разлика се покрива со државни субвенции, кои повторно ќе продолжат.

Премиерот Христијан Мицкоски истакна дека не очекува драстичен раст на сметките, иако можна е минимална корекција.

– Ако има зголемување, тоа би било во рамки од еден до три проценти. Нема да дозволиме зголемување од 30 до 35 проценти, како што го бара Европската комисија. Стандардот на граѓаните мора да се заштити, изјави премиерот.

Мицкоски не ја соопшти конкретната цена што ја предложило ЕСМ, бидејќи информацијата е класифицирана како дел од затворена владина седница.

Од Регулаторната комисија за енергетика (РКЕ), од која зависи конечната пресметка на сметките за домаќинствата, велат дека не се очекува промена во нивниот дел од трошокот, кој учествува со 36 проценти во финалната цена на електричната енергија.

– Во делот кој РКЕ го регулира – преносот и дистрибуцијата – не очекуваме промени. Финалната цена ќе зависи од понудата на ЕСМ и од тоа колкав процент од потребите ќе бидат покриени, соопштија од РКЕ за „Вечер“.

Овој пат тендерот за набавка на струја за универзалниот снабдувач ЕВН Хоум се спроведува за цела година, наместо за шест месеци, што ќе значи дека утврдената цена во декември ќе важи за целата 2025 година.

Во меѓувреме, ЕСМ продолжува да се соочува со финансиски предизвици. До крајот на септември компанијата има загуби над 90 милиони евра, а за увоз на електрична енергија се потрошени повеќе од 60 милиони евра. Останува да се види како овие трошоци ќе влијаат врз крајната цена што ќе ја плаќаат домаќинствата.

Крајната одлука се очекува до крајот на месецот.