Литванија вечерва целосно ја затвори границата со Белорусија, откако нејзиниот аеродром во Вилнус беше блокиран по четврти пат за една недела, поради навлегување на неидентификувани летачки објекти – балони со хелиум кои влегле во нејзиниот воздушен простор.

Премиерката Инга Ругињене изјави дека никаков хибриден напад нема да се толерира, најавувајќи дека балоните ќе бидат соборени. Според радарските податоци, вкупно 66 објекти биле забележани во текот на ноќта.

Литванските власти веруваат дека балоните ги користат шверцери на цигари од Белорусија, но додаваат дека Русија и Белорусија можат да стојат зад координирана психолошка операција насочена кон дестабилизација на земјата.

„Ова е хибридна и психолошка операција со која се сака да се наруши секојдневниот живот на Литванците“, изјави Деивидас Матулионис, советник на претседателот Гитанас Науседа.

Границата со Белорусија ќе биде затворена за сите освен за дипломати и граѓани на ЕУ што ја напуштаат Белорусија, а во среда ќе се одлучува дали затворањето ќе стане неопределено и целосно.

Белорусија реагираше остро, нарекувајќи ја одлуката „провокација дизајнирана да ги оправда антибелоруските политики“. Според руската агенција ТАСС, белоруското претпријатие Минсктранс веќе откажало неколку автобуски линии кон Латвија и Литванија.