Нов скандал ја тресе американската и светската јавност – милијардерот Илон Маск и британскиот принц Ендрју се најдоа меѓу имињата во најновата серија документи поврзани со озлогласениот педофил и финансиски магнат Џефри Епстин.

Според Би-Би-Си, материјалите што ги објавија демократите во Конгресот покажуваат дека Маск бил поканет на приватниот остров на Епстин во декември 2014 година. Иако самиот Маск тврди дека ја одбил поканата, документите отворија нови прашања и шпекулации за неговата поврзаност.

Уште поголем потрес предизвика информацијата дека во мај 2000 година принцот Ендрју бил патник на лет од Њу Џерси кон Флорида во авион поврзан со Епстин. Британскиот принц и порано беше во центар на контроверзии околу случајот, но тој упорно негира каква било вина.

Ова е трета серија документи предадени од имотот на Епстин на Одборот за надзор и реформи на Претставничкиот дом. Во нив има телефонски пораки, дневници од летови, финансиски книги и дури и распоред на самиот Епстин. Освен Маск и Ендрју, во досиејата се спомнуваат и други моќни имиња – како интернет милијардерот Питер Тил и поранешниот советник на Доналд Трамп, Стив Бенон.

Случајот повторно ја разгоре јавната дебата околу мрежата на врски што Епстин ја градел со најмоќните луѓе во светот пред да биде уапсен во 2019 година и пронајден мртов во затвор.