Илјадници граѓани се собраа во Скопје на 8 март за протестниот марш „Нема да не снема”, организиран од граѓанската иницијатива „Кој е следен?” и десетина невладини организации. Со тоа денешниот Осмомартовски марш стана еден од најбројните досега.

Учесниците се собраа кај споменикот на Жена Борец и со минута молк оддадоа почит кон жените кои ги загубиле животите. Потоа маршот тргна кон зградата на Владата, каде граѓаните ги искажаа своите барања, а заврши во Градскиот парк.

На транспарентите доминираа пораки: „Нема слобода без слободни жени”, „Правда за Ивана”, „Правда за Катја”, „Правда за Росица”, „Не уште една”. Меѓу позабележителните пораки беа и „Трпи си, пријави си, умри си” и „Смртен 8 Март драги дами” – пораки кои ја отсликуваа горчината кон системот.

Организаторот Марта Стефковска објасни дека маршот е израз на отпор против „фигуративното и буквалното бришење на жените во овој систем кој ги угнетува, игнорира и не ги слуша нивните барања и плачови за помош против насилство”.

Учесниците пренесоа јасна порака до власта: „Мора да се извините на сите жени кои живеат во постојан страв и стрес, зашто поради вашиот немар сме несигурни насекаде – дома, на улица или во институции”.

Маршот заврши во Градскиот парк, каде беа положени цвеќиња пред споменикот на Вера Јоциќ, симбол на борбата за слобода и рамноправност.