Додека целата индустрија трча да набута вештачка интелигенција во секое поле за пребарување, се случува нешто спротивно и многу поинтересно: милиони луѓе бараат начин да ја исклучат. Пребарувачот DuckDuckGo штотуку објави додатоци за Chrome и Firefox што ја прават неговата верзија без ВИ стандардна – без генерирани одговори, без чет-прозорци, без вештачки слики во резултатите. И корисниците летаат кон неа.

Бројките се речити. Посетите на страницата без ВИ скокнаа за околу 30 проценти за една недела, инсталациите во САД за над 18 проценти, а на 28 мај сообраќајот кон таа страница се утрои. Во просек, посетите се околу 84 проценти над вообичаеното – и не паѓаат, што значи дека не е минлив бран, туку промена на навика.

Од каде дојде ова? Од Google. Кога технолошкиот гигант во мај го редизајнира пребарувањето така што ВИ-резимеата ги турнаа класичните линкови во втор план, многумина сфатија дека веќе не пребаруваат – им се сервира готов одговор, без можност сами да проценат од каде доаѓа. А готов одговор без извор е токму она во што паметниот корисник не верува.

Иронијата е што DuckDuckGo не е „анти-ВИ” компанија – има сопствен чет-бот и претплати со напредни модели. Поентата не е дека вештачката интелигенција е лоша, туку дека некој одлучи таа да биде задолжителна, без да праша. А кога нешто ти се наметнува како единствена опција, секогаш вреди да се запрашаш кому му одговара тоа да биде така.