Националната опера и балет на 30 октомври во 20 часот ја изведува „Набуко“ од Џузепе Верди. Диригира Мирон Михалидис од Грција, а режијата е на Италијанецот Ренато Бонајуто.

Насловната улога ја пее Марјан Јованоски, Абигаиле е Злата Тошевска Димовска, Фенена Николина Јаневска, Исмаил Ѓорѓи Цуцковски, а првосвештеникот Захарие Александар Стефановски. Сценографијата е на Флавио Арбети, костимите на Артемио Кабаси, кореографијата на Маја Митревска Богојевска. На сцената се хорот и оркестарот на куќата, женскиот балетски ансамбл и ученици од балетскиот оддел на училиштето „Илија Николовски – Луј“.

„Набуко“ е праизведена во миланската Ла Скала во 1842 година и е операта што го направи Верди славен. Хорот на заробените Евреи „Va, pensiero“ стана симбол на италијанското обединување и до денес е еден од најпрепознатливите хорски моменти во оперската литература. Народ во туѓина што пее за изгубената татковина – на Балканот таа слика не бара превод.

Билетот чини 800 денари. Продажбата е на билетарницата на операта, со телефони објавени на operabalet.mk.